QR Mádenıet jáne sport mınıstri Aqtoty Raıymqulova bastaǵan delegasııa Almaty oblysy Qapshaǵaı qalasynyń mańynda ornalasqan «Uly Dala Tańy» fılminiń túsirilim alańyna baryp qaıtty, dep habarlaıdy Egemen.kz.
«Uly Dala Tańy» tarıhı fılmi Qasym hannyń ómiri, handyq bıligi men Qazaq handyǵynyń gúldenip, nyǵaıýy jolyndaǵy kúresi týraly baıandaıdy. Kınotýyndyny QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirip jatyr.
Mınıstrdiń jumys saparyna buqaralyq aqparat quraldary ókilderi de qosylyp, tarıhı fılminiń túsirý barysyna ortaqtasty.
Túsirilim alańynda jýrnalıster shyǵarmashylyq toptyń kúrdeli sahnalardyń biri – Ulytaýdaǵy shaıqastyń túsirilimin tamashalap, úziliste rejısser Aqan Sataevpen jáne basty róldegi akter Berik Aıtjanovpen suhbattasty.
– Túsirilimder oıdaǵydaı júrip jatyr, jumystyń jartysy aıaqtaldy. Búgin túsirilimniń 41-shi kúni, biz sheshýshi ári qıyn sahnalardyń birin túsiremiz. Túsirilimge 300-ge jýyq adam qatysady – 56 kaskader, 200-den astam shabandoz bar. Túsirý jumystary jospar boıynsha jalǵasyp jatyr, – dedi Aqan Sataev.
Sondaı-aq, rejısser shilde aıynyń basynda Almaty oblysy Kegen aýylynyń mańynda Qasym han aýylynyń kóshin túsiretinin, al keıin túsirý jumystary Ile ózeniniń boıynda osy fılmge beıimdelgen «Túrkistan» dekorasııasynda jalǵasatynyn habarlady.
Esterińizge sala keteıik, «Uly Dala Tańy» fılminiń túsirilimi bıyl aqpan aıynyń sońynda Almaty oblysy Kóktal kentiniń mańynda bastaldy. Jobanyń Bas prodıýseri – Álııa Nazarbaeva, ssenarıı avtorlary – Bekbolat Shekerov pen Aqan Sataev, qoıýshy sýretshi – Qýat Tleýbaev; qoıýshy operatory – Hasan Qydyralıev, grım boıynsha sýretshiler – Lıdııa Ordynskaıa, Botagóz Ábdibaeva, kostıým boıynsha sýretshi – Dına Býksıkova.
Tarıhı jobanyń ǵylymı keńesshiligine tarıhshy, tarıh ǵylymynyń doktory, professor Bereket Káribaev, fılosofııa jáne sáýlet óneri doktory Almas Ordabaev, sýretshi-keskindemeshi, tarıh ǵylymdarynyń kandıdaty, etnograf-qarý jasaýshy Qalıolla Ahmetjan tartylǵan.
Fılmdegi basty rólderdi Berik Aıtjanov (eresek Qasym han), Danııar Orazaev (jas Qasym han), Aıdos Ábdiqadyrov (jas Buryndyq han), Erik Joljaqsynov (eresek Buryndyq han), Nurlan Álimjanov (Muhammed Shaıbanı), Altynaı Nógerbek (jas Jahan Begim), Shamshagúl Meńdııarova (qart Jahan Begim), Tuńǵyshbaı Jamanqulov (eresek Álı Rashıd), Qýanysh Qudaıbergen (jas Álı Rashıd) syndy akterlar somdap jatyr.