1952 jyldyń erte kóktemi bolatyn. Baıaý syrǵyp jatqan kerýen kúnderdiń birinde keregede ilýli turǵan tymaq búlk etip, eki aı boıy únsiz jatqan shaqalaq týra toǵyz aıǵa tolǵan kúni shar ete qalady.
Úıdegilerdiń qolyndaǵy shaı iship otyrǵan keseleri túsip-túsip ketedi. Muny qazaq nysana der edi. Sol shar etken kúninen bastap, ómiriniń sońyna deıin ultynyń joǵyn joqtap, shyryldap ótken sol sábı – «Alash balasy baı, qýatty bolsa eken!» dep shyn tilegen Nurtileý Imanǵalıuly bolatyn. Shyndyqty shyńǵyrtyp, aqıqatty ashyq aıtatyn qazaq telejýrnalıstıkasynyń metri Nurtileý Imanǵalıuly osylaı ómirge kelipti.
О́ziniń sanaly ǵumyryn el ıgiligine ekran arqyly arnaǵan televızııa tarlanyn bar qazaq jaqsy kórdi. Tipti el onyń ózin kórmese de, daýysyn jazbaı tanyr edi. Telejýrnalıstıkanyń tutas mektebine aınalǵan tulǵany el eshqashan umytpaq emes.
Jalpy jýrnalıstıkanyń ishinde reportajdy jaýynger janr desek, sol salany aqsatpaı alyp júrgen birden-bir tulǵa Nurtileý Imanǵalıuly bolatyn. Zamanynda Qarabaqtyń qaq ortasynda turyp, tikeleı efırde habar taratyp, oq pen ottyń ortasynda júrip materıal ázirlegen de osy esim edi.
Kásibin kánigi óner dep baǵalaıtyn adam ǵana murat minberin baǵyndyrady. Ol qarapaıym ǵana qalpymen jurtshylyqtyń júrek tórine kóterildi. Ekrannyń ar jaǵynda otyryp-aq elmen emen-jarqyn máslıhat qurdy. Mıkrofonymen-aq máseleniń sheshilý jolyna tóte tartatyn. Nyq júretin, nyǵarlap sóıleıtin.
Qazaq televızııasynyń Djentelmeni, suraq qoıýdyń da suńǵylasy degen sıpattamalary taǵy bar. Ol qazaq jigiti qandaı bolý kerektigin qur sózben emes, symbatty da syrbaz, kúmisten tartqan symdaı tip-tik tulǵasymen, eńseli de erkin shalqaq keýdesimen úlgi etip kórsetetin. Onyń kókeıindegi kórikti oılar kópshiliktiń júrek sózindeı bolatyn.
«Baı, qýatty bolaıyq!». Jadymyzda jattalyp qalǵan, el esindegi esti osy sózdiń ıesi búginde ortamyzda joq. О́kinishti, árıne... Biraq sońyna úlken mektep qaldyrǵan tulǵa tuǵyry eshqashan alasarmaq emes.