Biryńǵaı jınaqtaýshy zeınetaqy qory salymshylarynyń zeınetaqy jınaqtary 2021 jylǵy 1 maýsymdaǵy jaǵdaı boıynsha 12,7 trıllıon teńgeden asty, dep habarlaıdy Egemen.kz.
2021 jylǵy 1 qańtardan 1 maýsymǵa deıingi bes aıdyń ishinde BJZQ salymshylarynyń shottaryna 654,2 mlrd teńge mólsherinde taza ınvestısııalyq tabys eseptelgenin atap ótý mańyzdy. Bul ótken jyldyń bes aıymen salystyrǵanda 155 mlrd teńgege nemese 31% artyq.
Qazaqstan Respýblıkasy Ulttyq bankiniń basqarýyndaǵy BJZQ zeınetaqy aktıvteri boıynsha kiristilik jyl basynan beri 5,3%, al ınflıasııa 3,5% boldy. Sońǵy 12 aıda ınflıasııa 7,2%, kiristilik 11,7% kórsetti. Salymshylardyń (alýshylardyń) zeınetaqy jınaqtarynyń somasy zeınetaqy aktıvterin ınvestısııalaý nátıjelerine sáıkes apta saıyn qaıta esepteledi jáne qaıta baǵalanady. Investısııalyq tabystyń quramyna baǵaly qaǵazdar (salymdar jáne basqa operasııalar) boıynsha syıaqy, qarjy quraldaryn naryqtyq qaıta baǵalaý, valıýtalyq qaıta baǵalaý túrindegi kirister, syrtqy basqarýdaǵy aktıvter boıynsha kirister jáne t. b. kiredi.
Jalpy, barlyq zeınetaqy aktıvteri BJZQ-ǵa biriktirilgen sátten bastap Ulttyq bank qamtamasyz etken ınvestısııalyq tabys shamamen 5,3 trln teńge boldy. 2021 jyldyń 1 maýsymyndaǵy jaǵdaı boıynsha zeınetaqy jınaqtarynyń jalpy kólemindegi taza ınvestısııalyq tabystyń úlesi 36,1% boldy. Eger Qazaqstannyń jınaqtaýshy zeınetaqy júıesi qurylǵan 1998 jyldan bergi kezeńdi alsaq, taza ınvestısııalyq tabys 6,2 trıllıon teńgeden asty. Osy ýaqyt ishinde ınvestısııalyq kiristilik ósý qorytyndysymen 640,01% qurady. Al ınflıasııa 517,53% boldy.
Osylaısha jınaqtaýshy zeınetaqy júıesi qoldanysqa engizilgen sátten bastap 2021 jylǵy 1 maýsymǵa deıingi kezeńde zeınetaqy aktıvteriniń naqty kiristiligi 122,48% kórsetti. Aıta ketý kerek, zeınetaqy jınaqtary – bul uzaq merzimdi ınvestısııalar, sondyqtan ınvestısııalyq tabystyń mólsherin keminde 1 (bir) jyl kezeńinde taldaǵan oryndy. Qysqa merzimdi derekter (kúndelikti, aı saıynǵy jáne t.b.) kórsetkish bolyp tabylmaıdy, óıtkeni, olar kúndelikti naryqtyq jaǵdaıǵa baılanysty.
Investısııalyq basqarý men zeınetaqy aktıvterin esepke alýdyń barlyq júıesi ashyq: árbir salymshy óziniń ınvestısııalyq tabysyn enpf.kz saıtyndaǵy jeke kabınetten nemese uıaly qosymshanyń kómegimen baqylaı alady.
BJZQ-nyń zeınetaqy aktıvterin ınvestısııalyq basqarý jáne zeınetaqy aktıvteri ornalastyrylǵan qarjy quraldary týraly aqparat Qordyń resmı saıtyndaǵy (www.enpf.kz) «Kórsetkishter/Investısııalyq qyzmet» bóliminde jarııalanyp otyrady.