Balyq sharýashylyǵy sý aıdyndaryn taýarlyq balyq sharýashylyǵyn júrgizý úshin kásipshilik sý aıdyndarynan aýystyrý qaǵıdalary bekitildi. Sondaı-aq zańnamalyq deńgeıde paıdalanýshynyń tor sharýashylyǵyn júrgizý úshin kásipshilik balyq sharýashylyǵy ýchaskesin paıdalaný quqyǵy kózdelgen. Bul týraly Ortalyq kommýnıkasııalar qyzmeti alańynda ótken brıfıngte Ekologııa, geologııa jáne tabıǵı resýrstar mınıstrligi Balyq sharýashylyǵy komıtetiniń tóraǵasy Narıman Júnisov málimdedi, dep habarlaıdy Egemen.kz.
Onyń aıtýynsha, balyq sharýashylyǵyn júrgizýge arnalǵan úlgi shart bekitildi jáne osy shartty jasasýdyń naqty merzimi – 49 jyl bolyp belgilendi.
«Buryn kelisim shart jasasý merzimi 5 jyldan 49 jylǵa deıin bolatyn. Bul belgisizdik bızneske bolashaqqa senimdilik bermedi jáne ınvestısııa tartýdy tejedi. Sondaı-aq balyq sharýashylyǵyn damytý josparlary sheńberinde balyq ósirýshilerge qoıylatyn artyq talaptar alynyp tastaldy. Búgingi tańda balyq ósirýshilerge qoıylatyn jalǵyz talap: jyl saıyn belgili bir bıologııalyq negizge sáıkes balyqtyń belgilengen kólemin ósirý. Sonymen qatar balyq ósirý sharýashylyqtaryn sý qorǵaý beldeýine ornalastyrý boıynsha shekteýler alynyp tastaldy. Balyq ósirý toǵandary men basseınderin salý kezinde jobalaý-smetalyq qujattamany ázirleý jáne memlekettik saraptamanyń qorytyndysyn alý jónindegi talaptar alynyp tastaldy. Bıznes aýyl sharýashylyǵy maqsatyndaǵy jerlerde balyq ósirý sharýashylyqtaryn salý kezindegi shyǵyndardy óteýden bosatyldy. Taǵy aıt keterligi qoldanystaǵy memlekettik qoldaý sharalarymen qatar, jem-shóp qunynyń 30%-yn sýbsıdııalaý jáne balyq ósirý sharýashylyqtaryna arnalǵan tehnıka men jabdyqtar satyp alýǵa ınvestısııalyq salymdar kezinde shyǵystardyń 25%-yn óteý», dedi vedomstvo ókili.
Bul sharalarǵa sondaı-aq balyq ósirý - bıologııalyq negizdemeler qunynyń 50%-yna deıin sýbsıdııalaýdyń jańa túrleri; balyq ósirý materıalyn; dárilik preparattardy satyp alý; sondaı-aq baǵaly balyq túrlerin retke keltirý-analyqttaryn satyp alýǵa jáne kútip-ustaýǵa arnalǵan shyǵyndar qosyldy.
«Qazaqstanda balyq sharýashylyǵyn júrgizý úshin barynsha tıimdi jaǵdaılar pysyqtalyp jatyr, sondyqtan balyq sharýashylyǵy sýbektilerin, ınvestorlardy jáne balyq ósirýmen aınalysýǵa nıet bildirgen barlyq bıznesmenderdi balyq ósirýmen aınalysýǵa shaqyramyz», dedi komıtet basshysy.
Barlyq máseleler boıynsha múddeli tulǵalar Komıtetke jáne onyń aýmaqtyq bólimshelerine júgine alady. Koordınattary men baılanys derekteri Komıtettiń saıtynda ornalastyrylǵan.