Qaıdan bilgenbiz?! Osy ýaqytqa deıin elimizdegi eń bıik sarqyrama Jońǵar Alataýyndaǵy Burhan bulaq, Altaıdaǵy Kókkól eken dep júrsek, odan da bıigi bar eken ǵoı. Kónekózder aıtpaqshy, О́r Altaıdyń búkken syry kóp. Áneýgúni taý kezbe fotograf Evgenıı Domashev tikushaqpen Muztaýǵa qaraı ushyp bara jatyp, jaqpar tasty shyńnan qulaı aqqan bıik sarqyramany sýretke tartypty.
Evgenıı Domashev Altaıdyń tumsa tabıǵatyn fotoǵa túsirýmen ondaǵan jyldan beri aınalysady. Muztaýǵa deıingi joldyń soqpaǵyn bes saýsaǵyndaı biledi. Jo-joq, Altaı – jumbaq. Ár barǵan saıyn tańǵaldyrady, ár barǵan saıyn ózine ǵashyq etedi. Bes saýsaǵyndaı biledi degenim, jalǵandaý. Shyǵystyń bul pushpaǵyndaǵy tylsym mekenderdi Rerıhterdiń ózi tolyqtaı asha almady-aý deımin. Áıtpese E.Domashev túsirgen sarqyramany tarıhı jazbalardan kózimiz shalar edi ǵoı. Múmkin keıin paıda boldy ma?– Muztaýdy tikushaqpen betke aldyq. Zeńgir kókte emes, taý-taýdyń arasymen ushtyq. Ár sátti sýretke tartýǵa tyrystym. Bir kezde qarsy aldymyzdaǵy bıikten qulaı aqqan sarqyramany kózim shaldy. Altaıdyń qoıyn-qolatyn qansha aralasam da, bul kórinisti birinshi ret kórdim. Ǵajap! Keıin 50 000 masshtabtaǵy relefti kartadan sýdyń qulaý bıiktigin eseptesem, 292 metr eken. Oılańyz, 300 metrge taıaý, – dep tańǵalady fotograf Evgenıı Domashev. Fotograftyń aıtqan sarqyramasy sonaý Muztaýdyń muzdyqtarynan bastalyp, Aqbulqaq ózenine quıatyn kórinedi. Naqty aqparat aıtý úshin adam aıaǵy baspaǵan bul mańǵa zertteýshiler at izin salýy kerek shyǵar. Eń bastysy, úlken jańalyq ashyldy. Endigi kezekte arnaıy mamandar nazar aýdaryp, zertteýi kerek.
Shyǵys Qazaqstan oblysy