Qyrǵyzstan bıligi gýmanıtarlyq kómek retinde Qazaqstan jibergen undy satatyn boldy. Respýblıkanyń TJM ókilderi onyń sebebin atady, dep habarlaıdy Egemen.kz.
QR TJM janyndaǵy Memlekettik materıaldyq rezervter qory aqparatyna súıensek, buǵan deıin Jelide Qazaqstannan ákelingen unnyń saqtaý merzimi shekteýli ekeni týraly aqparat jarııalanǵan. Qor bul aqparat joqqa shyǵardy.
«2021 jyly mamyrda respýblıkaǵa gýmanıtarlyq kómek jelisi boıynsha Qazaqstan Respýblıkasynan 10 myń tonna mólsherinde joǵary, birinshi surypty un kelip tústi. Ol barlyq sapalyq kórsetkish boıynsha EAEO jáne memlekettik standart normatıvtik qujattarynyń talaptaryna sáıkes keledi. Baýyrlas halyq tarapynan bul kómek únemi, ásirese Qyrǵyzstan úshin qıyn ýaqytta kórsetiledi. Mysaly, 2020 jyly koronavırýs pandemııasy ortasynda bes myń tonna mólsherinde un men gýmanıtarlyq kómek kórsetildi», delingen habarlamada.
Vedomstvo málimeti boıynsha, maýsym aıynan bastap Qyrǵyzstanda aýa temperatýrasy 32-35 gradýsqa deıin jáne odan joǵary kóteriledi, shildede aptap kútiledi. Bul qaptaǵy undy saqtaý sharttaryna teris áser etedi.
«Mınıstrler kabıneti Qazaqstan Respýblıkasynan kelgen gýmanıtarlyq unnyń sapa kórsetkishteriniń nasharlaýyna jol bermeý maqsatynda osy undy satyp, odan túsken qarjyǵa memlekettik rezervke uzaq ýaqytqa saqtaý úshin azyq-túlik bıdaıyn satyp alý, sol arqyly respýblıkanyń azyq-túlik qaýipsizdigin qamtamasyz etý týraly sheshim shyǵardy», dep túsindirdi qor ókilderi.
Eske salaıyq, mamyrda Prezıdent Qasym-Jomart Toqaev Qyrǵyzstanǵa gýmanıtarlyq kómek kórsetýdi tapsyrǵan bolatyn.