Búgin Geraldıkalyq zertteýler ortalyǵynyń dırektory qyzmetine Álibek Asqarov taǵaıyndaldy. Jańa basshyny ujymǵa mınıstr men Arhıv isteri jáne qujattamany basqarý komıtetiniń tóraǵasy Qýat Borashev tanystyrdy, dep habarlaıdy Egemen.kz.
Álibek Asylbaıuly Asqarov - jazýshy, polıgrafıst, Qazaqstannyń eńbek sińirgen qaıratkeri, Qazaqstan Respýblıkasy Memlekettik syılyǵynyń laýreaty, Qazaqstan Jýrnalıstıka Akademııasy men Qazaqstan Kórkemóner akademııasynyń akademıgi, 10-nan astam kitaptyń avtory.
Aıta keteıik, memlekettik rámizderge qurmetpen qaraýdy qalyptastyrý jáne vedomstvolyq nagradalardyń geraldıkalyq sıpattamasyn jetildirý jónindegi usynystar ázirleý maqsatynda Mádenıet jáne sport mınıstrligi Arhıv isteri jáne qujattamany basqarý komıteti janynan Geraldıkalyq zertteýler ortalyǵy quryldy.
Ortalyq bazasynda memlekettik rámizderdi zerdeleý, nasıhattaý jáne qoldaný, memlekettik stıldi qalyptastyrýda memlekettik saıasatty iske asyrý boıynsha túrli is-sharalar ótkiziletin bolady. Sondaı-aq memlekettiń ózin-ózi sáıkestendirý prosesterin jáne geraldıkalyq belgilerdi qoldaný jónindegi halyqaralyq tájirıbeni zerdeleý boıynsha da is-sharalar kiredi. Qazir ortalyq nagradalardy sıpattaý men marapattaý negizderine qoıylatyn biryńǵaı talaptardy ázirleý boıynsha jumys istap jatyr.