Gazetimizdiń 2013 jylǵy 26 jeltoqsan kúngi nómirinde jaryq kórgen jýrnalıst Jylqybaı Jaǵyparulynyń «PIK – kúrmeýi kúrdeli kooperatıv» atty maqalasy jer-jerde úlken qoǵamdyq pikirler týǵyzýda. Maqala jaryq kórgen kúnniń erteńine Astana qalasynyń ákimi Imanǵalı Tasmaǵambetov óziniń BAQ ókilderimen jyl aıaǵynda ótetin dástúrli kezdesýinde bul ózekti máselege erekshe toqtalyp, izinshe qalalyq gazetterdiń osy maqalany kóshirip basýyna muryndyq boldy. Jańa jyldyń alǵashqy kúnderinde-aq gazet poshtasyna aǵylyp kelip jatqan oqyrman hattary da kópshilik múddesine tikeleı qatysty bul ózekti jaıdyń eshkimdi beıjaı qaldyrmaı otyrǵandyǵyn kórsetedi. Tómende biz Qaraǵandy oblysynan kelgen pikirlerdi jarııalap otyrmyz.
Gazetimizdiń 2013 jylǵy 26 jeltoqsan kúngi nómirinde jaryq kórgen jýrnalıst Jylqybaı Jaǵyparulynyń «PIK – kúrmeýi kúrdeli kooperatıv» atty maqalasy jer-jerde úlken qoǵamdyq pikirler týǵyzýda. Maqala jaryq kórgen kúnniń erteńine Astana qalasynyń ákimi Imanǵalı Tasmaǵambetov óziniń BAQ ókilderimen jyl aıaǵynda ótetin dástúrli kezdesýinde bul ózekti máselege erekshe toqtalyp, izinshe qalalyq gazetterdiń osy maqalany kóshirip basýyna muryndyq boldy. Jańa jyldyń alǵashqy kúnderinde-aq gazet poshtasyna aǵylyp kelip jatqan oqyrman hattary da kópshilik múddesine tikeleı qatysty bul ózekti jaıdyń eshkimdi beıjaı qaldyrmaı otyrǵandyǵyn kórsetedi. Tómende biz Qaraǵandy oblysynan kelgen pikirlerdi jarııalap otyrmyz.
Turǵyn úı-kommýnaldyq sharýashylyq salasyndaǵy shalaǵaı qyzmet qaraǵandylyqtardyń da ókpe-renishin ósirip júrgen másele. «Egemen Qazaqstan» gazetiniń 2013 jylǵy 26 jeltoqsandaǵy sanynda jaryq kórgen gazet tilshisi Jylqybaı Jaǵyparulynyń «PIK – kúrmeýi kúrdeli kooperatıv» atty maqalasy osy saladaǵy qordalanǵan kemshilikterdiń betin ashyp, kópshiliktiń kóńilindegi máseleni tap basty. Jaǵdaıdy retteýge, qalpynda saqtaýǵa mindet artyp, úlken jaýapkershilik júkteýshi páter ıeleri kooperatıvteriniń kóbi senimdi aqtaı almaı-aq kele jatqany bárimizge aıan. Olardyń qurylǵanyna biraz jyl ótip, kúsh te, tájirıbe de jınaqtalǵandaı ýaqyt bolsa da úıler men aýlalardy talapqa saı ustaýǵa degen qulshynys joq.
Bizdiń osynaý kóshe boıyndaǵy 32-shi úıdi meken etýimizge 30 jyldan asty. Bertingi jyldarda «Arman» atty PIK qaraýyna endi. Basynda ony qurýshylardyń ýáde-ýájinen úlken úmit kútilgen edi. Ýaqyt óte kele bári aldarqatpa sóz bolyp shyqty. Besinshi qabattaǵy páterimizdiń tóbesinen qar, jańbyr sýy syzdyqtaıtyndyqtan biteýge birneshe jyl boıy ótinish jasap baqqanymyzben oryndalmady. Aqyry amal ne, kórshiler aqsha qosyp, jóndetýge májbúr boldyq. Páterlerimizdiń qysta salqyn bolýyna baılanysty jylý jelisin jańartý úshin talaı aryz-shaǵymymyzǵa da qulaq aspady. Taǵy qarajat jınap, syrttan jóndeýshiler shaqyrýǵa týra keldi.
Kireberister 30 jyldan beri áktelmegen, sylaǵy ábden túsken qalpynda tur. Jertóle ishi kóp rette tizeden sýǵa qalqyp qalady. Jaz jaǵymsyz ıis qolqa atady. Qaısysyn aıta bereıik, «Arman» PIK-i tarapynan úıimizdiń jaı-kúıine qaraılasýǵa eshqandaı beıil joqtyǵy qajytty.
Al jarna jınaýǵa kelgende bul jaǵyna asa saq. Aı saıyn aýla sypyrýshyǵa árbir páterden 600 teńge tólenýin eskertip, qulaq mazalap baǵady. Ony ne úshin, qandaı ister úshin talap etiletindigin bilmeımiz. Kúrdeli jóndeýlerdi bylaı qoıǵanda qubyrdan sý aǵyp, sham sóne qalsa da kómek kórsetilmeıdi. Tysqary bireýge jóndetýge jalynasyń taǵy.
«PIK – kúrmeýi kúrdeli kooperatıv» atty maqalany oqyǵanda osy jaılar kóz aldyma keldi. Buǵan kóne berýge bola ma? Bolmaıdy dep oılaımyz. Bul júıede tártiptilik pen jaýapkershilikti kúsheıtpeıinshe jaǵdaı jaqsarmaıtyndyǵy anyq. Qaıtkende, osy salany saýyqtyrar bir amal kerek.
Kúnim ILIаSOVA,
Qaraǵandy qalasynyń turǵyny.