Shymkentte QR eńbek sińirgen ártisi, Shymkent qalalyq opera jáne balet teatrynyń dırektory Maıra Muhamadqyzynyń bastamasymen Táýelsizdiktiń 30 jyldyǵy jáne 8 naýryz – Halyqaralyq áıelder kúnine «Domalaq ana» operasynyń premerasy ótti, dep habarlaıdy Egemen.kz.
«Domalaq ana» – Táýelsiz Qazaqstan jyldarynda jazylǵan ekinshi opera. Jańa qoıylym elde alǵash ret sahnalanyp otyr, eki aktili, 160 ártis ról somdaǵan. Operanyń kompozıtory – QR Mádenıet salasynyń úzdigi, Halyqaralyq baıqaýlardyń laýreaty Tasqyn Jarmuqamet. Lıbrettosyn jazǵan Qazaqstannyń eńbek sińirgen qaıratkeri, rejısser Ashat Maemırov. Ideıa avtory – Qazaqstannyń eńbek sińirgen ártisi, Memlekettik syılyqtyń laýreaty Maıra Muhamedqyzy. Qoıýshy-rejısser – reseılik «Úlken teatr» rejısserlik tobynyń meńgerýshisi, Reseı jáne álem opera teatrlarynyń opera qoıýshysy Mıhaıl Pandjavıdze.
Qoıylymda qazaq tarıhyndaǵy aty ańyzǵa aınalǵan abyz ananyń ózine tán qasıetti beınesi tereńdikpen jetkizilgen. Jas qyz Nýrılanyń ana atanyp, ósıet pen rýhanı qundylyqtarǵa jáne analyq meırimge toly ǵumyry arqyly ana mahabbaty sýrettelgen. Endi «Domalaq ana» operasy aldaǵy ýaqytta álemdik sahnalarda qoıylmaq.
Sonymen birge, teatrdyń 13 maýsymy Uly Abaıdyń 175 jyldyǵyna oraı «Abaı armany» atty konserttik keshpen ashyldy. Jyl boıyna 1 premera 12 qoıylym sahnalandy. Al jabylý maýsymyn «Teatr jaýharlary» atty Gala-konsertpen aıaqtady.