Túrkistandyq dárigerler shala týǵan úshemdi aman alyp qaldy. Jyl basynan beri óńirde altynshy úshem dúnıege keldi. Oblystyq qoǵamdyq densaýlyq saqtaý basqarmasynyń málimetinshe, náresteler Túrkistan qalasynda ornalasqan №3 oblystyq perınataldyq ortalyqta dúnıege keldi.
Úsh ul balany 39 jastaǵy Dılhýmar Iýsýpova ota arqyly bosanǵan. Dárigerler týǵanda salmaǵy nebári 1,7 kılo shamasyndaǵy úsh uldy 13 kún boıy kútip, jetildirgen. Merziminen erte týǵan úshem perzenthana dárigerleriniń baqylaýyna alynǵan.
Medısına qyzmetkerleriniń kómegimen sábıler salmaq qosyp, jaǵdaıy jaqsardy. Túrkistandyq dárigerlerdiń biliktiligi men kútiminiń, tynymsyz eńbeginiń nátıjesinde shala týǵan shaqalaqtar aman qalyp, analary olardy baýyryna basty.
Mamandardyń aıtýynsha, qazir olardyń ómirine tónetin esh qaýip joq. Nárestelerge jaqyndary Hasan, Hýsan jáne Mýhammad esimderin bergen.
Aıta ketsek, úshem dúnıege kelgen otbasynyń tórt qyzy men eki uly bar. 39 jastaǵy kelinshek 9 balanyń anasy atandy. Kópbalaly ana úı sharýasynda, al otaǵasy – qarapaıym jumysshy.
Byltyr oblys ortalyǵynda 10 myńǵa jýyq sábı, al jyl basynan beri 6 myń náreste dúnıege keldi. Ortalyq dárigerleri jyl saıyn júzdegen shala týǵan nárestelerdiń ómirin saqtap qalýda.
Eskendir ERTAI
Túrkistan oblysy