Senator Sergeı Ershov Qaraǵandy oblysyndaǵy saparyn ushqyshtar quramyn daıarlaý jónindegi avıasııalyq oqý ortalyǵyna barýdan bastady, dep habarlady Senattyń baspasóz qyzmeti.
Depýtat onda áskerı bólimderdiń qyzmetimen tanysyp, áskerılerge ótken sessııa barysynda Senat qabyldaǵan zań jobalary týraly aıtyp berdi. Ol birqatar zań áskerı qyzmetshilerdiń áleýmettik-turmystyq jaǵdaılaryn jaqsartýǵa baǵyttalǵanyn atap ótti.
Sergeı Ershov sonymen qatar artıllerııalyq brıgada qyzmetkerlerimen, sondaı-aq Prıozersk qalasyndaǵy órt sóndirý jáne avarııalyq-qutqarý jumystary qyzmetiniń qyzmetkerlerimen áńgimelesti.
«Bul bólimshe barlyq zamanaýı talaptarǵa tolyq sáıkes keledi. Qyzmet jyldam júzetin qutqarý katerlerimen, súńgýir jáne sýda qutqarý jabdyqtary men quraldardyń jańa úlgilerimen jabdyqtalǵan», dep atap ótti Sergeı Ershov.
Senatordyń máslıhat depýtattarymen jáne aımaq basshylyǵymen kezdesýi barysynda yntymaqtastyqty kúsheıtý jáne birlesken jumysty údetýdiń mańyzy týraly sóz boldy.
* * *
Májilis depýtattary Jámılá Nurmanbetova, Eldos Abaqanov, Dınara Zákıeva elordadaǵy birqatar áleýmettik nysanda boldy, dep habarlady tómengi Palatanyń baspasóz qyzmeti.
«№1 kópbeıindi qalalyq balalar aýrýhanasy» aıasynda qurylǵan Qazaqstan Respýblıkasy Tuńǵysh Prezıdenti Qorynyń «Qamqorlyq» saýyqtyrý ortalyǵynda Parlament ókilderi erekshe qajettiligi bar balalardy qoldaý máseleleriniń qalaı sheshilip jatqanyna kóz jetkizdi. Atalǵan ortalyq mamandary árbir bala úshin onyń aýrýynyń ereksheligin eskere otyryp, jeke baǵdarlama daıyndaıdy. Balalarmen nevrologter, defektologter, psıhologter jumys isteıdi. Balalardyń densaýlyq jaǵdaıyn qalpyna keltirý úshin zamanaýı tehnologııalar paıdalanylady. О́tken jyldyń jeltoqsan aıynda qurylǵan ortalyqta qazirdiń ózinde 300-deı bala saýyqtyrýdan ótti. Al jalpy jyl boıyna 600-deı balanyń em qabyldaý múmkindigi bar.
Májilistiń Áleýmettik-mádenı damý komıtetiniń tóraǵasy Jámılá Nurmanbetovanyń aıtýynsha, Qazaqstanda turaqty saýyqtyrýdy qajet etetin 90 myńnan astam bala bar. Elbasynyń bastamasymen osyndaı ortalyqtar búkil respýblıka boıynsha qurylýda. Bul – Nur Otan partııasynyń saılaýaldy baǵdarlamasyndaǵy negizgi basymdyqtardyń biri. Elimizde ınklıýzıvti qoǵamdy damytý úshin depýtattar birqatar zań jobasy boıynsha belsendi jumys atqarýda.
Sondaı-aq depýtattar 1200 oryndy mektep qurylysynyń jumys barysymen tanysyp, Nur-Sultan qalasyndaǵy birqatar sport-saýyqtyrý kesheninde boldy.
Pavlodar oblysyna sapar barysynda Májilis depýtattary, Nur Otan partııasy fraksııasynyń músheleri Aıgúl Nurkına, Anatolıı Boıchın jáne Vera Kım Ekibastuz qalasynda «RWA Wheelset» JShS kásipornynyń jumysshylarymen kezdesti. Zaýyttyń tehnologııalyq múmkindikterin, sondaı-aq óndirletin ónimge suranysty eskere otyryp, depýtattar jalaqyny kóterý jáne jastar áleýetin tıimdi paıdalaný máselelerine basa nazar aýdardy. Aıgúl Nurkınanyń aıtýynsha, óndiris ornynda jas mamandardyń kásibı ósip-jetilýi úshin barlyq jaǵdaı jasalǵan.
Májilis depýtattary, Nur Otan fraksııasynyń músheleri Albert Raý, Samat Akıshev, Álııa Saparova jáne Ekaterına Smyshlıaeva partııanyń saılaýaldy baǵdarlamasynyń oryndalý barysymen tanysý kezinde Rýdnyı qalasyndaǵy 60 páterli eki turǵyn-úı qurylysymen tanysty. Bul úıler áleýmettik jaǵynan az qamtylǵan 120 otbasyn baspanamen qamtamasyz etedi dep kútilýde. Qurylys jumysy bıylǵy jyldyń sońynda aıaqtalady dep josparlanǵan. Kezdesýde depýtattar birqatar ózekti máseleni talqylady. Ásirese qurylys materıaldarynyń qymbattaýy, qurylys qarqynynyń baıaýlyǵy nazar aýdararlyq. Máselen, jalǵa beriletin páterge 3 myń adam kezekte tur, al osy jyly tek 120 páter ǵana paıdalanýǵa beriledi. Kóptegen másele turǵyn úı saıasaty týraly tujyrymdamada qamtylǵan. Ol kúzde Májiliste qaralatyn bolady.
Depýtattar atap ótkendeı, Rýdnyı qalasynda partııanyń saılaýaldy ýádeleriniń ýaqytynda oryndalýyna eshqandaı kedergi joq. Baspana máselesi josparlanǵan ýaqytta sheshimin tappaq.