Nur Otan partııasy janyndaǵy Jumyspen qamtýdy jáne halyqtyń áleýmettik osal toptaryn qoldaý jónindegi respýblıkalyq Qoǵamdyq keńestiń otyrysynda áleýmettik qyzmetter kórsetý sapasyn jetildirý, kedergisiz qalalyq ınfraqurylym qurý jáne erekshe qajettilikteri bar azamattardy jumysqa ornalastyrý máseleleri qaraldy.
«Búginde ázirlenip jatqan Áleýmettik kodeks «qarjylandyrý qyzmet alýshyǵa ilesip júrýi tıis» qaǵıdasyna sáıkes bolýy tıis. Qaraǵandyda turatyn múgedektigi bar adamdar qoǵamdyq kólikti jergilikti bıýdjet qarajaty esebinen tegin paıdalanady. Alaıda elordaǵa kelgende, qoǵamdyq kólikte tegin júre almaıdy», dedi keńes múshesi, Qaraǵandy oblysy ákiminiń múgedektigi bar adamdar máseleleri jónindegi shtattan tys keńesshisi Nııaz Súnditalıev.
Keńes múshesi, «Arman – ANK» qoǵamdyq birlestiginiń úılestirýshisi Gúlnar Omarova erekshe qajettilikteri bar azamattarǵa ekpe egý máselesine toqtaldy. Onyń aıtýynsha, búginde úıge baryp ekpe egý tek tósek tartyp jatqandar úshin ǵana júrgiziledi. Sondaı-aq múgedektigi bar kóptegen adamnyń habardarlyǵy tómen bolǵandyqtan, olar ekpe egýge bolmaıtyn jaǵdaılar týraly bilmeıdi.
Buǵan jaýap retinde Eńbek jáne halyqty áleýmettik qorǵaý vıse-mınıstri Erlan Áýkenov erekshe qajettilikteri bar adamdardy vaksınalaý máselesi Densaýlyq saqtaý mınıstrliginiń ókilderimen birge jergilikti jerlerde pysyqtalatynyna sendirdi.