9 shildede Qaraǵandyda «Qaıyrymdy ister marafony» jalpyulttyq jobasy men «El tiregi – Elbasy» respýblıkalyq aksııasy aıasynda 287 az qamtylǵan otbasyna azyq-túlik jıyntyǵy tabystaldy. Ataýly áleýmettik kómek alǵandardyń ishinde kópbalaly otbasylar men múmkindigi shekteýli balalar da bar.
Aksııaǵa AYALA qaıyrymdylyq qory men «Halyq» qoǵamdyq qory demeýshilik etti.
Azyq-túlik jıyntyǵy «Shańyraq» kópbalaly otbasylardy qoldaý ortalyǵynda taratylyp, volonterler men belsendiler azyq-túlikti mekenjaılarǵa jetkizdi.
«Biz 287 jıyntyq aldyq. Ony múmkindigi shekteýli balalary bar jáne kópbalaly az qamtylǵan otbasylarǵa ákimdik usynǵan tizim boıynsha taratamyz. Búgin 50 jıyntyq tarattyq. Qalǵanyn kelesi aptada úlestirip beremiz. Bul iste bizge Jas Otan volonterleri kómektesýde. Turǵyndar aksııanyń uıymdastyrýshylaryna jáne demeýshilerine alǵysy men rızashylyǵyn bildirip, pandemııa kezinde bul jaqsy kómek bolǵanyn aıtyp jatyr», dedi «Shańyraq» kópbalaly otbasylardy qoldaý ortalyǵynyń dırektory Lázzat Qojahmetova.
Shilde aıynda AYALA qaıyrymdylyq qorynan azyq-túlik jıyntyǵyn aımaqtaǵy qıyn materıaldyq jaǵdaıda qalǵan 1 250 otbasy alady. Budan buryn qaıyrymdylyq qory kórsetken kómek aıasynda Qaraǵandy oblysynda azyq-túlik jıyntyǵymen aımaqtaǵy 17 qala men kenttegi myńǵa jýyq otbasy qamtylǵan bolatyn. Onyń ishinde Qaraǵandy, Balqash, Jezqazǵan, Prıozersk, Sátbaev, Saran, Temirtaý, Shahtınsk, Abaı, Aqtoǵaı, Buqar jyraý, Jańarqa, Qarqaraly, Nura, Osakarov, Shet jáne Ulytaý qalalary bar.
Eske sala keteıik, «Qaıyrymdy ister marafony» jalpyulttyq jobasy Qazaqstan Táýelsizdiginiń 30 jyldyǵyn merekeleý aıasynda Memleket basshysy Qasym-Jomart Toqaevtyń bastamasymen osy jyldyń aqpan aıynda bastalǵan bolatyn. Joba Aqparat jáne qoǵamdyq damý mınıstrligi men Azamattyq bastamalardy qoldaý ortalyǵynyń qoldaýymen júzege asyrylýda. Jyl basynan beri marafonǵa 2,5 mln-nan astam adam qatysty, ataýly kómek 167 myń adamǵa kórsetildi.
Marafonǵa nıet bildirgen kez kelgen azamat qatysa alady. Bul úshin óziniń ıgi isterin áleýmettik jelilerde#QAIYRYMDYISTERMARAFONY #MARAFONDOBRYHDEL resmı heshtegimen jarııalaýy kerek. Uıymdastyrý máseleleri boıynsha myna nómirlerge +7 701 513 55 00, +7 7172 79 15 32 nemese ınstagramdaǵy @qaiyrymdy_ister_marafony akkaýnty arqyly habarlasýǵa bolady.