Oblystyq «Qostanaı tańy» gazetiniń dereginshe, Denısov aýdanynda úsh adam sibir jarasyn juqtyrǵan. Naýqastar qazir oblys ortalyǵyndaǵy juqpaly aýrýlar stasıonarynda emdelip jatyr. Jara olarǵa maldan juqqan, dep jazady Egemen.kz.
Qostanaı oblysynyń sanıtarııalyq-epıdemıologııalyq baqylaý departamenti taratqan habarlamada iri sharýashylyqtardyń birinde mal shyǵyny da bar ekeni aıtylǵan. Epıdemıologtar men mal dárigerleri sibir jarasy qozdyrǵyshynyń sebebin bildi. Alaıda, ınfeksııa kózi ázirge anyqtalǵan joq.
«Qazir jarany juqtyrý oshaǵynda epıdemııaǵa qarsy jáne epızootııaǵa qarsy profılaktıkalyq is-sharalar júrgizilýde. Indetke qatysy bar adamdar bakterııaǵa qarsy em alady, sodan keıin olar sibir jarasyna qarsy vaksınamen egiledi», dep atap ótti sanıtarııalyq-epıdemıologııalyq baqylaý departamentiniń asa qaýipti ınfeksııalar bóliminiń basshysy L.Nalobına.
Onyń málimdeýinshe, kóbine ınfeksııa kózi bolatyn oryndar – tyıym salynǵanyna qaramastan, jaıylymǵa aınalǵan eski sibir jarasy kómindileri.
«Alaıda, aýrý tirkelgen fermada mundaı jerleý oryndary joq. Munyń sebebi aptap ystyqtan týyndaǵan qurǵaqshylyqtyń kesiri degen boljamymyz bar. О́riste jaıylǵan mal shaǵyn shópti tamyrymen julyp jegende topyraqta qalǵan sibir jarasyn juqtyrýy múmkin», deıdi departament ókili.