Qostanaı oblysynda polıseıler 5-12 shilde aralyǵynda «Zańsyz mıgrant-2021» jedel aldyn alý sharasyn ótkizdi. Bir apta ishinde kóptegen zańbuzýshylyq faktisi anyqtaldy, dep habarlaıdy Egemen.kz.
Polısııa departamentiniń aıtýynsha, atalǵan sharany ótkizýge mobıldi toptar uıymdastyryldy. Olar bazarlarda, salynyp jatqan nysandarda, sharýa qojalyqtarynda, sheteldik azamattardyń ýaqytsha bolý oryndarynda reıdter júrgizgen.
«Kóshi-qon zańnamasyn buzǵany úshin 181 sheteldik azamat, onyń ishinde 30-y eńbek qyzmetin zańsyz júrgizgeni úshin, 140-y belgilengen merzimde ketýden jaltarǵany úshin ákimshilik jaýapqa tartyldy. Atalǵan tulǵalarǵa qatysty ákimshilik yqpal etý sharalary qoldanyldy. Qostanaı oblysynyń sottary 9 sheteldikti elden shyǵarý týraly sheshim shyǵardy», dep túsindirdi polısııada.
Sondaı-aq 106 sheteldik azamattyń ýaqytsha bolý merzimi qysqartyldy. Qazaqstannyń 108 azamaty sheteldikterdiń kelýi týraly ishki ister organdaryn ýaqtyly habardar etpegeni úshin ákimshilik jaýapqa tartyldy.
«Polısııa departamenti «Halyqtyń kóshi-qony týraly» QR Zańynyń babyna sáıkes qabyldaýshy tulǵalar ózderine keletin ımmıgranttar týraly ishki ister organdaryn olar kelgen kúnnen bastap úsh jumys kúni ishinde habardar etýge mindetti. «QR QK 394-baby («Zańsyz kóshi-qondy uıymdastyrý») boıynsha 4 qylmystyq is tirkeldi, qazirgi ýaqytta tergeý amaldary júrgizilýde.
Osy baptyń sanksııasy eki myń aılyq eseptik kórsetkishke deıingi mólsherde aıyppul salýdy, qoǵamdyq jumystarǵa tartýdy nemese eki jylǵa deıin bas bostandyǵyn shekteýdi kózdeıdi», dedi vedomstvoda.