2021 jyldyń úshinshi toqsanynda áleýmettik tólemderdiń úsh túrin resimdeý úshin memlekettik qyzmetter kórsetýdiń eksterrıtorııalyq qaǵıdaty engiziletin bolady.
Qazaqstandyqtar turaqty tirkeý mekenjaıyna qaramastan, elimizdiń kez kelgen HQO-na júgine alady. Bul týraly Ortalyq kommýnıkasııalar qyzmetinde ótken brıfıngte «Azamattarǵa arnalǵan úkimet» memlekettik korporasııasy tóraǵasynyń orynbasary Birjan Júnisov aıtty.
Qazir turaqty tirkeý jerine qarasty HQO-ǵa júginý – áleýmettik tólemderdi resimdeýdiń basty talabynyń biri.
«Memlekettik qyzmetterdi kórsetý úderisin sıfrlandyrý baǵyttarynyń biri – aýmaqtan tys qaǵıdatty engizý. Úshinshi toqsanda osy qaǵıdat arqyly qazaqstandyqtar balanyń týylýyna jáne bala kútimine baılanysty járdemaqyny, júktilik pen bosanýǵa, jańa týǵan sábıdi asyrap alýǵa baılanysty kiristerin joǵaltqan jaǵdaıda áleýmettik tólemder alýǵa ótinish bere alady jáne bir jasqa tolǵan kezde balany kútýge baılanysty tabysy joǵalǵan jaǵdaıda, tirkeý ornyna qaramastan, eldiń kez kelgen halyqqa qyzmet kórsetý ortalyǵyna qujat ótkize alady. Jyl sońyna qaraı biz basqa tólemder boıynsha da eksterrıtorııalyq qaǵıdatty engizýdi josparlap otyrmyz», dedi Birjan Júnisov.
2021 jyldyń birinshi jartyjyldyǵynda «Azamattarǵa arnalǵan úkimet» áleýmettik salada 815 myń memlekettik qyzmet kórsetti. Jalpy, memlekettik korporasııa tólemderdiń 44 túri boıynsha elektrondy is maketterin qalyptastyrady jáne mindetti zeınetaqy, áleýmettik jáne medısınalyq aýdarymdar boıynsha derbestendirilgen esep júrgizedi.
«Egemen-aqparat»