Olımpııalyq derevnıa Oıyndarǵa daıyn
HHII Qysqy Olımpıadanyń bastalýyna 29 kún qaldy
Álem kóz tikken Sochı Olımpııalyq oıyndarynyń bastalýyna týra bir aı ýaqyt qaldy. Osy oraıda bizdiń oqyrmandardy dúbirli doda ótetin jerdiń daıyndyǵy da qyzyqtyrary haq.
Olımpııalyq derevnıa Oıyndarǵa daıyn
HHII Qysqy Olımpıadanyń bastalýyna 29 kún qaldy
Álem kóz tikken Sochı Olımpııalyq oıyndarynyń bastalýyna týra bir aı ýaqyt qaldy. Osy oraıda bizdiń oqyrmandardy dúbirli doda ótetin jerdiń daıyndyǵy da qyzyqtyrary haq.
Bul máselege baılanysty Reseı prezıdenti Vladımır Pýtın jaqynda arnaıy jıyn ótkizip, aqtarylǵan jumystardy bir pysyqtap shyqty. Onda Sochı Olımpıadasy uıymdastyrý komıtetiniń tóraǵasy Dmıtrıı Chernyshenko josparlanǵan jumystardyń kezeń-kezeńmen iske asyrylyp jatqanyn málimdedi. Dál qazir Sochı áýejaıynyń aýmaǵy 62 myń sharshy metrge keńeıtilgen. Shetelden keletin ushaqtardyń tizbesi taǵy bir márte naqtylanyp, qosymsha baǵyttar ázirlendi. Osy tusta atap óter bir jaıt, áýejaı saǵatyna 2,5 myń jolaýshyǵa qyzmet kórsete alady. Halyqaralyq Olımpıada komıtetiniń talabyna saı, ol endi 3,8 myń adamǵa qyzmet kórsetýdiń múmkindigin jasaǵaly otyr.
Jalpy, jarys ótetin orynnyń ınfraqurylymyn daıyndyq sapyna keltirý jumysy 2007 jyldan qolǵa alyndy. Qazirgi kezde munda ár sportshynyń jattyǵýy men tynyǵýy úshin kerekti barlyq jaǵdaı jasalǵan. Osy isti júıeli uıymdastyrýdy óz mindetine alǵan «Bazovyı element» kásiporny bas dırektorynyń orynbasary Andreı Elınson Olımpıada ótetin aýmaqty qajetti jabdyqtarmen qamtýǵa 6 mlrd. rýbl jumsalǵanyn aıtady. Onyń aınalasyndaǵy saýda núkteleri de meımandardyń qajetin óteýge saqadaı-saı ázir tur.
Bizge kelip túsken sońǵy derek kózinde Olımpıadaǵa arnaıy shyǵarylǵan bılettiń 60 paıyzǵa jýyǵyn Reseı tóńiregindegi turǵyndardyń satyp alǵany jazylǵan. Osydan-aq olardyń dúbirli dodany asyǵa kútip júrgeni ańǵarylady. Degenmen, jergilikti bılik ókilderi meımandarǵa qyzmet kórsetetin qonaqúılerdi retke keltirý isin kúni buryn qolǵa aldy. Ondaǵy árbir bólmede ınternet paıdalanýǵa múmkindik jasalǵan.
«Sochı-2014» uıymdastyrý komıteti syrttan keletin kólikterge jarys ótetin jerge barýyna shekteý qoıylǵanyn málimdedi. Sondaı-aq, Olımpıada alańyna baratyn jol arnaıy aq syzyqpen belgilengen. «Qazirgi tańda 21 myń kólik arnaıy tirkeýden ótti. Onyń 17,5 myńy Olımpıadaǵa qatysýǵa kelgen sportshylar men meımandarǵa qyzmet jasasa, 3,5 myńy túrli zattardy tasymaldaıdy. Bir sózben aıtqanda, jol qaýipsizdigi qatań baqylaýda bolady», – dedi kólik dıreksııasynyń bas dırektory Andreı Jýkov.
Taǵy bir jaǵymdy jańalyq. «Aeroflot» áýe kompanııasynyń ókilderi jahandyq jarys kúnderi «Máskeý – Sochı – Máskeý» baǵytyndaǵy ushaqtarǵa bıletter arzandatylǵan baǵamen satylatynyn málimdedi. Osyǵan oraı eki aralyqqa baryp-kelý bıleti bar-joǵy 5 myń rýbl turady.
Ámirhan ALMAǴANBETOV,
«Egemen Qazaqstan».