Atyraýda birneshe adamdy aldap, aqshasyn alǵan alaıaq áıel 3 jyl 1 aıǵa sottaldy, dep habarlaıdy Egemen.kz.
Atyraý qalalyq polısııa basqarmasynyń tergeýshisi, polısııa aǵa leıtenanty Nurbolat Ersultannyń málimetinshe, jergilikti azamatsha birneshe adamdy aldap kelgen.
«Aldymen byltyrǵy tamyzda tanysyna Atyraý qalasyndaǵy «Nursaıa» shaǵyn aýdanynan 3 bólmeli páter alyp berýge ýáde etip, 800 myń teńge aqshasyn ıemdengen. Keıin qarashada taǵy bir azamatshamen tanysyp, oǵan da 4 bólmeli páter alyp beremin dep 495 myń teńgesin alǵan. Budan soń bıylǵy qańtarda «WhatsApp» jelisindegi jer teliminiń jarnamasy arqyly jergilikti azamatpen tanysqan. Sol azamattan «Samal» shaǵyn aýdanynan jer telimin alýǵa kómektesý úshin 750 000 teńge suraǵan», deıdi Nurbolat Ersultan.
Onyń aıtýynsha, alaıaq áıelge qatysty QR Qylmystyq Kodeksiniń 190-babynyń 3-bóligi, 4-tarmaǵymen tergeý amaldary júrgizilip, is sotqa joldandy. Sot sheshimimen alaıaq áıelge 3 jyl 1 aıǵa bas bostandyǵynan aıyrý jazasy taǵaıyndaldy. Sottalýshy jábirlenýshilerge keltirilgen zalaldy ótep berýi tıis.