20 shilde kúni Nur-Sultan qalasynyń meshitterinde dástúrli aıt namazy ótkizilmeıdi. Bul týraly elordanyń din isteri jónindegi basqarma basshysy Nurdáýlet Álmuhanov aıtyp berdi, dep habarlaıdy Egemen.kz.
«Barsha Nur-Sultan qalasynyń turǵyndary men qonaqtaryn kele jatqan qasıetti Qurban aıt merekesimen quttyqtaımyn. 2021 jyly Qurban Aıt dinı merekesi 20-22 shilde aralyǵynda ótedi. Sanıtarlyq-epıdemıologııalyq jaǵdaıǵa baılanysty 20 shilde kúni barlyq meshitte dástúrli aıt namazy ótkizilmeıdi», dedi N. Álmuqanov Nur-Sultan qalasynyń ákimdiginde ótken brıfıngte.
Onyń aıtýynsha, Nur-Sultan qalasynda Qurban aıt merekesinde qurbandyq shalý byltyrǵydaı onlaın formatta Qazaqstan musylmandary dinı basqarmasynyń qurban2021.kz saıty arqyly júrgiziledi.
«Sanıtarlyq-epıdemıologııalyq qaýipsizdik sharalaryn saqtaý jáne adamdardyń kóp mólsherde jınalmaýyn qamtamasyz etý maqsatynda jylda qurbandyq shalý rásimderi ótetin bazarlar men sharýa qojalyqtarynyń jumysy Qurban aıt merekesi kezinde toqtatylady. О́zimizdi jáne jaqyndarymyzdy qaýip-qaterden qorǵaıyq», deıdi basqarma basshysy.