Qazaqstandyq jas ánshi, «Slavıan bazary» halyqaralyq baıqaýynyń Gran-prı ıegeri Rýhııa Baıdúkenova jeńisten keıingi óz áserimen bólisti, dep habarlaıdy Egemen.kz.
«Kóńil kúıim keremet. Bul meniń eń alǵashqy úlken jeńisim jáne ony qazaq eline arnaımyn. Sebebi men otandastarymnyń qoldaýyn sezindim. Sonymen qatar osyndaǵy jergilikti halyq ta qoldaý kórsetti. Men ózim mýzykamen mektep jasynan bastap aınalysyp kelemin. Mektep bitirgen soń mýzykalyq kolledjge túsip, ony támamdap, qazir ulttyq óner akademııasynyń 3 kýrs stýdentimin. Aldaǵy maqsatym – óz ánderimdi oryndap, soǵan klıp túsirý. Sol sııaqty qazaqstandyq jáne sheteldik televızııalyq jobalarǵa qatysý. Sheteldik prodıýser nemese kompanııalardan usynys túsip jatsa, jumys isteýge ázirmin», dedi jas ánshi Rýhııa Baıdúkenova ZOOM alańynda ótken baspasóz máslıhatynda.
Sondaı-aq jerlesimiz, ánshi Dımash Qudaıbergen qoldaý kórsetkenin aıtyp ótti.
«Dımash Qudaıbergen baıqaýǵa deıin óz keńesterin berip, qoldaý kórsetti. Ásirese vokal jaǵynan súıemeldeý kórsetti. Baıqaý bastalǵan soń biz sóılespedik, óıtkeni ol tóreshi al men qatysýshymyn. Sondyqtan biz saıystyń ádil ótýin qaladyq», deıdi ol.