QR Saýda jáne ıntegrasııa mınıstrligi men Mastercard halyqaralyq tólem júıesi Qazaqstanda kásipkerlikti damytýdyń negizgi baǵyttary boıynsha birlesken jumys jasaý týraly Memorandýmǵa qol qoıdy, dep habarlaıdy Egemen.kz.
Bul mámile ShOB-tyń sıfrlyq jáne qarjylyq saýattylyǵyn arttyrý, elektrondyq tólemder men elektrondyq kommersııa quraldaryna qol jetkizý, sıfrlyq tólemder ınfraqurylymyn qurý jáne qazaqstandyq ShOB úshin startaptardy jedeldetý baǵdarlamalaryn qoldaýdy kózdeıdi.
QR Saýda jáne ıntegrasııa vıse-mınıstri Ásel Janasova atap ótkendeı, 2025 jylǵa qaraı Saýdany damytýdyń ulttyq jobasy aıasynda Qazaqstandaǵy elektrondyq saýda úlesiniń 15 paıyzǵa deıingi kórsetkishine qol jetkizý maqsaty qoıylǵan.
«Osy seriktestik aıasynda iske asyrylatyn birlesken bastamalarymyz bizdiń kásipkerlerge bıznesti sıfrlandyrý salasyndaǵy jetekshi halyqaralyq sarapshylar men mamandardan qajetti bilim men tájirıbe alýǵa múmkindik beredi dep úmittenemiz. Bul olarǵa saýda salasynda jumys strategııasyn ózgertýge, jańa formattardy, standartty emes sheshimder men qyzmetterdi tabýǵa kómektesedi. Elektrondyq saýda eldegi ekonomıkanyń ósý draıverleriniń biri, sondaı-aq jańa jumys oryndarynyń kózi bola alady», deıdi Ásel Janasova.
О́z kezeginde, Ortalyq Azııadaǵy Mastercard bas dırektory Rafal Trepka QR Saýda jáne ıntegrasııa mınıstrligimen yntymaqtastyq ornatqanymyzǵa qýanyshty ekenin jetkizdi.
«Bul strategııalyq seriktestik bizdiń jahandyq mindettemelerimizge sáıkes júzege asyrylady. Mastercard ShOB-ty qoldaý úshin aýqymdy keshendi tutas tásildemeni qabyldady, bul qazirgi ýaqytta ózekti. Biz QR Saýda jáne ıntegrasııa mınıstrligimen yntymaqtastyq ornatqanymyzǵa qýanyshtymyz. О́ıtkeni úkimettik organdar ekojúıeni qoldaý prosesinde erekshe ról atqarady. Bizdiń birlesken kúsh-jigerimiz Qazaqstan ekonomıkasyna jáne búkil qoǵamǵa paıdaly bolatynyna senimdimiz», dedi Ortalyq Azııadaǵy Mastercard bas dırektory Rafal Trepka.
Seriktestik bıylǵy jyldyń sáýir aıynan bastap tabysty júrgizilip kele jatqan bilim berý vebınarlarynyń serııasyn ótkizý arqyly ShOB-tyń sıfrlyq jáne qarjylyq saýattylyǵyn ilgeriletýdi kózdeıdi. «Jarnama jáne sıfrlyq jyljytý», «Bıznesten elektrondyq bızneske» jáne «Elektrondyq tólemder» taqyryptarynda vebınarlar ótkizildi. Bolashaq vebınarlardyń taqyryptary ShOB suranystary boıynsha tańdalady jáne búgingi kúni kásipkerler aldynda turǵan ózekti máselelerdi kórsetedi.
Seriktester AHQO Fınteh habymen áriptestikte SmartDuken (ShOB úshin elektrondyq kommersııa mektebi) platformasyn iske qosýdy josparlap otyr. SmartDuken – kásipkerlerge óz bıznesterin onlaın qurýǵa, damytýǵa jáne keńeıtýge kómektesetin alań. Platforma ShOB-qa tegin qoldaý men kómek kórsetýge, sondaı-aq óz bıznesin onlaın rejımine kóshirgisi keletin jáne ony jańa naryqtarǵa keńeıtkisi keletin ShOB úshin bıznes-akselerasııany usynýǵa baǵyttalǵan. Alańnyń maqsaty – halyqaralyq seriktesterdiń qatysýymen bıznesti sıfrlandyrýdyń basynan aıaǵyna deıin praktıkalyq jol arqyly ShOB-ty súıemeldeý jáne qatysýshylardy onlaın-formatta bıznes júrgizýge úıretý.
Yntymaqtastyq aıasynda Qazaqstanda ShOB sıfrlandyrý úshin Mastercard tólem tehnologııalaryn qoldaný múmkindigi, mysaly, Card on File, Payment Gateway, Acceptance and Trade sııaqty sheshimderdi qosa alǵanda, zerdelenetin bolady.
Start-up & Fintech Acceleration baǵyty boıynsha Startup Weekend Central Asia-2021 baıqaýlarynyń qazylar alqasynda Mastercard tálimger retinde qatysty. Sondaı-aq Mastercard AHQO Fintech Hub jáne Internet-bastamalardy damytý qorymen (Reseı) birlesip, 2021 jylǵy shildede Astana Finance Days konferensııasynda Qazaqstanda bankter úshin alǵashqy fınteh-akseleratordyń iske qosylǵany týraly habarlady.
QR Saýda jáne ıntegrasııa mınıstrliginen basqa jobalarǵa «DAMÝ» kásipkerlikti damytý qory, AHQO Fınteh haby, Kásipkerlik pen bıznes-ortany damytý boıynsha USAID jobasy, MOST bıznes-ınkýbatory, Yandex Direct, Ecwid, Robokassa kompanııalary jáne basqa da birqatar seriktester qatysty.
Ekonomıkalyq yntymaqtastyq jáne damý uıymynyń (EYDU) zertteýlerine sáıkes, COVID-19 pandemııasy álemde elektrondyq saýdanyń keń taralýyna yqpal etti. Jańa kásiporyndar qurylýda, jańa klıenttik tájirıbe qalyptasýda, jańa ónimder men qyzmetter usynylady. Qazaqstan halyqaralyq qoǵamdastyqtyń múshesi retinde de jahandyq trendterden tys qalmaıdy. Qazaqstanda elektrondyq saýda 2020 jyly aıtarlyqtaı damydy. Alaıda, e-commerce-tiń taralý deńgeıi onsha joǵary emes jáne bıznes úshin paıdalanylmaǵan múmkindikter kóp.
ALMATY