Batys Qazaqstan oblysynda koronavırýs ınfeksııasy boıynsha epıdemııalyq jaǵdaı kúrdeli kúıinde tur. Sońǵy aptada aýrýshańdyq deńgeıi 13%-ǵa ósken. О́ńirde halyqtyń jappaı ekpe alý qarqyny da joǵarylady.
Pandemııa bastalǵaly beri oblysta 27 819 adam koronavırýsqa shaldyqqan bolsa, bıylǵy shilde aıynyń basynan beri COVID-19-dy 2 836 batysqazaqstandyq juqtyrǵany anyqtaldy. Byltyrdan beri osy dertten 458 adam kóz jumdy. Ásirese sońǵy aptada ótken aptamen salystyrǵanda aýrýshańdyq deńgeıi 13%-ǵa óskeni baıqalǵan. Aýyrǵandar Oral qalasynda, Báıterek, Bórli aýdanynda kóp.
Karantındik talaptarǵa baılanysty Reseımen aradaǵy memlekettik shekaradan ótýshiler qatań baqylaýǵa alynǵan. 1 shildeden bastap oblys aýmaǵyndaǵy shekara beketterinen barlyǵy 19 375 adam ótse, sonyń ishinde 2 jolaýshydan, 8 júrgizýshiden koronavırýs anyqtalyp, oqshaýlanǵan. Aı basynan beri óńirde 34 503 márte PTR zertteýi jasalypty.
Sońǵy apta ishinde monıtorıng toptary eldi mekenderde 285 reıd júrgizip, 1 166 nysandy teksergen. Sonyń 24-inde karantın tártibi buzylǵany anyqtalyp, 29 hattama boıynsha kinálilerge 2 771 150 teńge aıyppul salynǵan.
Qazir óńirde barlyǵy 602 nysan Ashyq qosymshasy boıynsha qyzmet kórsetedi. Sońǵy aptada «qyzyl» mártebesi bar – 5, «sary» mártebesi bar 8 adam anyqtalyp, jeke tulǵalarǵa 306 285 teńge kóleminde aıyppul salynǵan.
Eldegi jáne óńirdegi kúrdeli epıdemııalyq ahýaldy kórip otyrǵan turǵyndar aldyn ala ekpe alýdyń paıdasyn túsine bastaǵan syńaıly. Vaksınalaý oblysta 1 aqpanda bastalǵan, qazir óńirde 66 ekpe beketi jumys istep tur. Oblysqa vaksınanyń 320 050 dozasy kelip túsken, onyń basym bóligi reseılik Spýtnık V bolsa, 7 myń doza QazVas, 50 myń doza Hayat Vax jáne Qytaıda óndirilgen 16 myń doza CoronaVac vaksınasy bar.
«Jalpy, oblys kóleminde vaksınanyń birinshi komponentimen 147 610 adam egildi. Ekpeniń qos komponentin alǵan batysqazaqstandyqtardyń sany – 80 970 adam. Maýsym aıy bastalǵaly halyqtyń vaksına alý yntasy artty. Turǵyndarǵa yńǵaıly bolý úshin emhanalardaǵy egý pýnktteri saǵat 23.00-ge deıin jumys istep tur. Aıta keteıik, 12 shilde kúni oblys aýmaǵynda 5 179 adam ekpe aldy, bul ázirge rekordtyq kórsetkish», deıdi Batys Qazaqstan oblystyq densaýlyq saqtaý basqarmasy basshysynyń mindetin atqarýshy Arman Qalıbekov.
Batys Qazaqstan oblysy