Batysqazaqstandyq azamattar, sharýa qojalyqtary bıylǵy qýańshylyqtan qıyn jaǵdaıǵa ushyraǵan mańǵystaýlyq áriptesterine kómek qolyn sozýda. 18 shilde kúni taı-taı shóp tıegen alǵashqy kólik Túpqaraǵan aýdanyna attandy.
Osydan bir apta buryn Batys Qazaqstan oblysynyń Bórli aýdanyndaǵy «Amanat» sharýa qojalyǵynyń jetekshisi Baqyt Dalabaev aqjaıyqtyq sharýalarǵa úndeý tastap, kómek qolyn sozýǵa shaqyrǵan bolatyn.
«Erdiń basyna da, eldiń basyna da ne kelip, ne ketpeıdi. Indet jaǵadan alyp býyndyryp jatqanda, elimizdiń keı óńirinde malǵa shóp tappaı, aq-adal túligi ólip jatyr. Jeıtin shóp joqtyǵynan karton shaınap, paket jegen maldy kórgende qatty qınaldyq. Qazaq halqy qıyndyqta bir-birin jylýsyz qaldyrmaıdy. Oǵan tarıh kýá. Sondyqtan bıyl mal azyǵynan tarylǵan aımaqtarǵa shóp jetkizemiz dep úndeý tastap, biraz sharýanyń basyn qaıyrdyq» deıdi B.Dalabaev.
Bul bastamany aldymen Bórli aýdany fermerleri qyzý qoldap áketti. Úsh kún ishinde qaıyrymdylyq marafonyna bórlilik 18 sharýa qojalyǵy qosyldy. Báıterek pen Shyńǵyrlaý aýdandarynan 3 fermerden, Tasqala men Terektiden 1 fermerden belsenip shyqty. Qaztalov pen Jánibek aýdany sharýa qojalyqtary shóp daıyndap berýge ýáde berip otyr. Az kúnde qarjylaı 171 myń teńge jınalǵan. Buǵan qosa «Baýyrlar Narm» sharýa qojalyǵynyń jetekshisi Nurlybaı Joldybaev ortaq qorǵa 100 myń teńge qosyp, márttik tanytty. О́ńirdegi «Azyqtúlikkorporasııa» uıymy da óz qorynan Mańǵystaýǵa 600 tonnadan asa arpa dánin bólýge sheshim qabyldaǵan.
Mańǵystaý malyna Jaıyq boıynyń kók shalǵynyn tıegen alǵashqy kólik 18 shilde kúni Bórli aýdany Sulýsaı aýlynan attandy. Aýyldaǵy «Raýan» JShS bas dırektory Shámil Muratbaıuly bastaǵan sharýalar 200 dana taılanǵan shóp jınap, teńiz boıyndaǵy aǵaıynǵa habar bergen eken. Mańǵystaý oblysy Túpqaraǵan aýdanyndaǵy «Azamat» sharýa qojalyǵynan Eljas Qojabekov óz kóligimen arnaıy kelip, alǵashqy 35 taı shópti artyp alyp ketti.
«Eldiń eldigi osyndaı qıyn sátte bilinedi ǵoı. Mańǵystaýlyq baýyrlarǵa kómek qolyn sozýǵa ázirmiz. Aýyldaǵy «Raýan» JShS jetekshisi Shámil Muratbaıuly, «Eńbek» ShQ basshysy Samat Iztaıuly, «Birlik» ShQ jetekshisi Asanov Ǵıbatolla, aýyl azamaty Ilııas Dúısenbaev degen jigitterdiń arqasynda osyndaı qaıyrymdylyq kerýeni Mańǵystaýǵa attanǵaly otyr. Bul kómek áli jalǵasady» deıdi Sulýsaı aýyldyq okrýginiń ákimi Nurlan Talaptanuly.
Batys Qazaqstan oblysy