Batys Qazaqstan oblysynda jolaýshy tasymalyn damytý maqsatynda Saıqyn, Jánibek jáne Qaztalov aýyldarynda shaǵyn ushaq ushyp qonatyn áýejaı salynady. Bul jóninde óńirlik jolaýshylar kóligi jáne avtomobıl joldary basqarmasy basshysynyń orynbasary Tımýr Shynııazov habarlaǵan.
Bókeı ordasy, Jánibek jáne Qaztalov aýdandarynyń ortalyǵynda áýejaı salý úshin tehnıkalyq-ekonomıkalyq negizdeme 2019 jyly ázirlengen eken. Ony «Edlı ı K» JShS jobalyq uıymy daıyndaǵan. «Qazirgi tańda úsh aerodrom salý jobasynyń tehnıkalyq-ekonomıkalyq negizdemesi memlekettik saraptamadan ótti. Endi jobalyq-smetalyq qujattamalar ázirleý sharalary alynyp jatyr», deıdi Tımýr Serikuly.
Basqarma basshylyǵynyń pikirinshe, shalǵaı aýdan ortalyqtarynda áýejaı salý jobasy aýdandardyń damýyna oń áser etedi, ishki týrızmdi damytýǵa múmkindik beredi, oblys ortalyǵy men aýdandar aralyǵynda úzdiksiz áýe qatynasyn qamtamasyz etedi. Aıta keteıik, Saıhyn men Jánibek aýyldary oblys ortalyǵy – Oral qalasynan 500 shaqyrymnan asa qashyqtyqta jatyr.
Áýejaı demekshi, Oral qalasyndaǵy halyqaralyq áýejaı ǵımaraty kópten beri jolaýshylar synyna ushyrap keledi. Áýejaı ǵımaratyna bastalǵan kúrdeli jóndeý jumysy sozylyp, qaıta jańǵyrtýǵa ulasyp ketti. Búginde onymen «Oral» áleýmettik-kásipkerlik korporasııasy men «Oral» halyqaralyq áýejaıy» JShS aınalysýda. Qaıta jańartý kezinde áýejaıdyń termınal aýmaǵy eki esedeı keńeıip, turaqtar uıymdastyrylady, aýmaq mańy abattandyrylady. Sondaı-aq aerovokzal termınalynyń tehnologııalyq qural-jabdyǵy jańartylyp, halyqaralyq standartqa, shekara jáne kedendik baqylaý talaptaryna sáıkestendirilmek. Qaıta jańartý somasy shamamen – 6,6 mlrd teńgeni quraıdy. Bul qarjy «Qarashyǵanaq Petroleým Opereıtıng b.v» kompanııasynyń áleýmettik-ınvestısııalyq jobalary sheńberinde bólinbek. Bas merdiger – «KazConstructionGroup» JShS.
«Qazir ǵımaratty montajdaý tolyq aıaqtaldy. Jobany túzetý boıynsha jumys júrgizildi. Ǵımarat tehnıkalyq turǵydan qaıta tekserilip, telimniń topografııalyq túsirilimi jasaldy. Ǵımarattyń ornalasýy jáne eskızdik joba oryndaldy», deıdi T.Shynııazov. Áýejaıdyń kóne ǵımaraty aýmaǵy 3850 sharshy metr bolsa, qaıta jańǵyrtýdan soń ol 7000 sharshy metrge deıin keńeımek. Jolaýshylar aǵyny jylyna 267 000 adamǵa jetedi dep josparlanǵan. Qaıta jańartý 2022 jyly aıaqtalmaq.
Búginde Oral qalasy áýejaıy arqyly halyqaralyq reıstermen Frankfýrt pen Antalııaǵa, al el ishindegi baǵyttarmen Nur-Sultan, Almaty, Atyraý, Aqtaý jáne Shymkent qalalaryna ushyp barýǵa bolady. Bıylǵy 2 maýsymda iske qosylǵan «Shymkent-Oral-Shymkent» baǵytyna ushaqtar seısenbi, juma kúnderi ushady.
Batys Qazaqstan oblysy