«QTJ» UK» AQ bas keńsesinde temirjolshylar men kómir tasymaldaýshylar kezdesip, aldaǵy jylý maýsymyna baılanysty týyndaıtyn ózekti máselelerdi talqylady, dep habarlaıdy Egemen.kz.
«QTJ» UK» AQ Basqarma Tóraǵasy Nurlan Saýranbaevtyń tóraǵalyǵymen ótken keńeske energetıka mınıstrligi, ındýstrııa jáne ınfraqurylymdyq damý mınıstrligi, básekelestikti qorǵaý jáne damytý agenttigi, kómir razrezderiniń ókilderi men tasymaldaýshylar qatysty.
Osy jylǵy alty aıda shoıyn jol arqyly 51,5 mln.tonna tas kómir tasymaldanǵan. Bul ótken jylmen salystyrǵanda 4%-ǵa kóbirek. Onyń ishinde otandyq tutynýshylarǵa 36,3 mln. tonna jetkizilgen. Salystyrmaly túrde alǵada bul byltyrǵy kórsetkishten 9% joǵary. Al, eksportqa 15,2 mln. tonna kómir jóneltildi.
«Eki máselege basa nazar aýdarǵym keledi. Birinshisi - jyl boıyna kómirdiń birkelki tıelýi jáne tamyzdan bastap otyn túriniń satyp alyna bastaýy. Bul jumys reti tıimdiligin kórsetip qana qoımaı kúzgi-qysqy maýsymda kólik tapshylyǵyna urynbaýǵa septiin tıgizdi. Sondyqtan barlyq múddeli toptyń osy qaǵıdany berik ustanǵany abzal. Ekinshisi - «Qaztemirtrans» AQ ózge de menshik ıeleri sekildi naryqta jumys istep jatyr. Osyǵan baılanysty júk jóneltýshilerdiń tasymaldanatyn kómirdi kólikpen qamtamasyz etý jaǵyn barlyq menshik ıelerimen aldyn ala kelisip alǵany jón», dedi «QTJ» UK» AQ Basqarma Tóraǵasynyń júk qozǵalysy jónindegi orynbasary mindetin atqarýshy Oralhan Qulaqov.
Qazaqstan aýmaǵynda 63 myńnan astam ashyq vagon (polývagon) bar, olardyń 40 myńnan astamy - QR jeke menshik ıeleri men kórshi memleketter vagon operatorlarynyń balansynda, 23 myńnan astamy – «Qaztemirtrans» AQ menshiginde.
Keńes qorytyndysy boıynsha osy jyldyń 1 tamyzyna deıin QTJ-da kómir tasymaldaý máseleleri jónindegi shtab jumysyn uıymdastyrý týraly sheshim qabyldandy.