Tokıo Olımpıadasynda Qazaqstan qorjynyna alǵashqy júldeni salǵan dzıýdoshy Eldos Smetov jarys aıaqtalǵan soń «Egemen Qazaqstan» tilshisine suhbat bergen edi.
– Qýanyshty sezimdemin. Biraq men Olımpıadaǵa altyn medal úshin kelip edim. Buıyrǵany osy boldy. Áıtse de ókinbeımin. Sebebi jartylaı fınaldaǵy beldesý fınalǵa bergisiz boldy. Takato óte myqty balýan. Birbirimizdi jaqsy bilemiz. О́zderińiz kórgendeı, shabýyl jasaımyn dep, «qaqpanǵa» túsip qaldym...
– Endi osynda basqa sportshylarǵa qoldaý kórsetetin bolarsyń?
– Olımpıadany uıymdastyrý komıtetiniń erejesi boıynsha jarysty aıaqtaǵannan keıin men 48 saǵatta Japonııadan shyǵyp ketýim kerek. О́kinishke qaraı, Olımpıada qalashyǵynda jigitterge qoldaý kórsete almaımyn.
– Gazet oqyrmandaryna, jankúıerlerińe qandaı tilek aıtasyń?
– Maǵan qoldaý kórsetken bapkerlerime, aǵalaryma myń alǵys aıtamyn. «Otan otbasynan bastalady» deıdi ǵoı. Meniń janashyrym – otbasyma da, halqyma da, barlyǵyna myń alǵys. Olımpıadanyń alǵashqy kúni jaman bolmady dep oılaımyn. Olımpıadada Qazaqstannyń Kók týy jelbirep, Ánuranymyz shyrqala bersin degim keledi.
– Aldaǵy josparyń qandaı?
– Qazir maǵan demalys kerek. Emdelip, qatarǵa qosylsam, Parıj Olımpıadasy týraly oılanýǵa bolady. Saıysqa túsetin jigitterge sáttilik tileımin. Men baǵyndyrmaǵan bıik belesterdi baǵyndyrsyn.
– Al eger de baǵyndyra almaı qalsa, ne bolmaq? Jaqsylyq Úshkempirovtiń armany taǵy da oryndalmaı qalaıyn dep tur ǵoı...
– Eger de jigitter altyn medalsyz qaıtsa, onda beldi býyp kelesi Olımpıadaǵa barýǵa daıynmyn.