Reseıdiń Sochı qalasynda ótip jatqan álem kýbogy jolyndaǵy jarystyń altynshy kezeńine joldama alǵan shahmatshylardyń alǵashqy legi anyqtaldy, dep habarlaıdy Egemen.kz.
Qazaqstan qurama komandasy músheleri arasynan bul mejege Dınara Sádýaqasova ǵana jetken edi. Bastapqy básekelerde amerıkalyq Djennıfer Iý, armenııalyq Elena Danıelıan jáne reseılik Alına Kashlınskaıa syndy myqty oıynshylarǵa san soqtyrǵan ol shırek fınaldyq saıysty da óte jaqsy bastady. Kóptegen halyqaralyq jarystar men «Úmitkerler týrnırinde» top jaryp, bul kúnderi FIDE reıtınginde ekinshi satyǵa jaıǵasqan reseılik Aleksandra Gorıachkınaǵa qarsy básekede qara tastarmen oınaǵanyna qaramastan qazaq qyzy teń esepke qol jetkizdi. Bul nátıjege kádimgideı marqaıǵan edik. Biraq qýanyshymyz uzaqqa sozylmady. Qarymta kezdesýde Sádýaqasova senim údesinen shyǵa almady. Sheshýshi tusta qatelikke boı aldyrǵan ol jeńilistiń kermek dámin tatty.
О́zge saıystar jaıynda aıtar bolsaq, reseılik Aleksandra Kostenıýk óziniń otandasy Valentına Gýnınadan basym tústi. Qytaılyq Tan Chjýnı orys shahmatshysy Ekaterına Lagnodan aılasyn asyrdy. Al ýkraınalyq Anna Mýzychýk pen grýzııalyq Nana Dzagnıdze arasyndaǵy kezdesýde teń esep tirkeldi. Bul kezdesýdiń jeńimpazy taı-breıkte anyqtalady.