Aqmola oblysyna jumys sapary barysynda Memleket basshysy John Deer markaly aýyl sharýashylyǵy tehnıkalarynyń barlyq túrine qyzmet kórsetetin TMD-daǵy eń iri servıs ortalyǵynyń jumysymen tanysty, dep habarlaıdy Egemen.kz Aqordanyń resmı saıtyna silteme jasap.
Prezıdent oqý bólmeleri men agregattyq sheberhanasy bar aýyl sharýashylyǵy tehnıkalaryn kúrdeli jóndeýden ótkizetin ortalyqty, sıfrlandyrý jáne avtomattandyrý úderisteri, zamanaýı tehnologııalar, ırrıgasııa jáne kókónis sharýashylyǵy jónindegi oqý ortalyǵyn, ónim saqtaıtyn qoımalar men kórme alańdaryn aralap kórdi.
Jańa aýtlet qazirgi zamannyń talaptary men úrdisterine jaýap beredi. Qazaqstan boıynsha qosalqy bólshekterdiń úzdiksiz jetkizilýin qamtamasyz etedi. Sonymen qatar tehnıkalardy kúrdeli jóndeý jáne qaıta qalpyna keltirý múmkindikterin keńeıtedi.
Qasym-Jomart Toqaev aýyl sharýashylyǵynyń elimiz úshin strategııalyq mańyzy zor sala ekenin atap ótti. Prezıdenttiń aıtýynsha, aldymyzda eńbek ónimdiligin arttyrý mindeti tur. Biraq zamanaýı tehnologııalardy engizbeı jáne menedjmentti jaqsartpaı oǵan qol jetkizý múmkin emes.
Memleket basshysy fermerler men zamanaýı tehnologııalardy meńgergen jas mamandardy oqytý jónindegi júıeli jumystardy jolǵa qoıýdyń mańyzdy ekenin aıtty. Bul, óz kezeginde, agrarlyq saladaǵy bilikti kadrlardyń tapshylyǵyna qatysty máseleni sheshýge septigin tıgizedi.