Oblystyq sanıtarlyq-epıdemıologııalyq baqylaý departamentiniń basshysy – bas sanıtar dáriger Mádenıet Tanaýovtyń málimetinshe, 25 maýsymnan beri qaýipti vırýsty juqtyrýshylar sany artqan. Máselen, 1-21 shilde aralyǵynda 5 082 jaǵdaı tirkelgen.
– О́tken aptada naýqastar sany 1,2 esege ósti. Qaýipti indettiń juǵý oshaǵy adamdar kóp jınalatyn oryndar bolyp tur. Naýqastardyń teń jartysy túngi klýbtar, toılar, eske alý is-sharalary men saýda úılerinde, bazarlarda, qoǵamdyq tamaqtaný oryndarynda juqtyrady. Sondaı-aq 23,8 paıyzy – naýqastarmen jaqyn qarym-qatynasta bolǵandar. Al 17,7 paıyzynyń qoǵamdyq kóliktermen júrý kezinde juqtyrǵany anyqtaldy, – deıdi M.Tanaýov.
Al oblystyq densaýlyq saqtaý basqarmasy basshysynyń orynbasary Qaısar Abdalıevtiń aıtýynsha, kúrdeli epıdemııalyq ahýal qalyptasyp otyr. Byltyrǵy alty aıda koronavırýs ınfeksııasynan 110 adam qaıtys bolǵan edi. Al bıylǵy qańtardan beri qaıtys bolǵandar adamdardyń sany 233-ke jetti. Epıdemııalyq ahýaldyń kúrdelenýine baılanysty dárigerlerge salmaq túsetini daýsyz. Qazir óńirde 6 575 medısına qyzmetkeri bar. Onyń ishinde dárigerler sany – 1 479, al orta jáne kishi medısına qyzmetkerleriniń quramy – 5 096 adam. Onyń ishinde 375 aq halatty aýrýhanalardaǵy ınfeksııalyq stasıonarlardyń «qyzyl aımaǵynda» jumys isteıdi. Taǵy 275 qyzmetker rezervke alynypty.
Qazir 41 vaksınalaý beketi jumys isteıdi. Onyń ishinde jyljymaly 10 beket bar. Jyl basynan beri vaksınalaý beketterine taratylǵan 141 200 doza vaksınanyń 93 paıyzy ıgerilgen. О́tken aptada taǵy da reseılik Spýtnık V vaksınasynyń ekinshi komponentine arnalǵan 10 myń dozasy jetkizildi. Al oblystyq perınataldyq jáne kardıologııa ortalyqtarynda, oblystyq, modýldik, №2 oblystyq aýrýhanalarda, Qurmanǵazy, Qyzylqoǵa, Inder aýdandyq aýrýhanalarynda 8 ottegi stansasy jumys istep tur. Sondaı-aq 1 514 pýlsoksımetr, 669 ottegi konsentratory, 272 ókpeni jasandy jeldetý, 13 kompıýterlik tomografııa, 41 rentgen, 4 MRT apparattary, 113 jedel medısınalyq kómek kóligi men 7 jyljymaly medısınalyq keshen bar.
Bir aıdan asa merzimnen beri «qyzyl aımaqtaǵy» óńirde koronavırýs ınfeksııasyn juqtyrý toqtar emes. Máselen, 24-26 shildede 1 346 adamnan qaýipti vırýstyń belgisi tabylǵan. Ásirese, naýqastardyń sany Atyraý qalasynda kóbeıip barady. Oblystyq densaýlyq saqtaý basqarmasy baspasóz qyzmetiniń deregine súıensek, úsh kúnniń ishinde munaıly shaharda koronavırýsqa shaldyqqan 976 pasıent anyqtalypty. Sondaı-aq sońǵy úsh kúnde Teńiz kenishinen 103, Jylyoı aýdanynan 115 naýqastyń tirkelýi alańdatpaı qoımaıdy.
Koronavırýs juqtyryp, úıinde emdelý úshin oqshaýlanǵandar sany da arta tústi. Qazir 3 839 adam úı jaǵdaıynda em-dom qabyldap jatyr. Buǵan qosa ınfeksııalyq stasıonarlardaǵy naýqastar sany 1 325 adamǵa jetti. Jaǵdaıy nasharlaǵan 78 naýqas jansaqtaý bólimine túsken. Onyń ishinde 10 pasıent ókpeni jasandy jeldetý apparatyna qosylǵan.
О́ńirdegi epıdemııalyq ahýal kúrdelengen soń karantındik shekteý men saqtyq sharalary qaıtadan kúsheıtildi. Máselen, barlyq deńgeıdegi ákimdikterdiń qyzmetkerleri men kelýshiler Ashyq baǵdarlamasyn qoldanady. Olar koronavırýs ınfeksııasyna qatysty mártebesin kórsetý arqyly kire alady.
– Bul talap oblystyq, qalalyq, aýdandyq jáne aýyldyq okrýg ákimdikterinde júzege asyrylady. Mundaǵy maqsat – adamdardyń saýlyǵyn saqtap, qaýipsizdigin qamtamasyz etý. О́ńirde sáýir aıynan beri Ashyq baǵdarlamasyna kásipkerler tarapynan 812 ótinish tústi. Onyń ishinde 781 nysanǵa QR-kod berildi. Kelýshilerdi tirkemegeni úshin 13 nysan baǵdarlamadan eki aptaǵa shyǵaryldy. Al 577 kásipkerlik nysany testtik rejimnen ótti, – dep habarlady oblystyq ákimdiktiń baspasóz qyzmeti.
Atyraý oblysy