Bilim jáne ǵylym mınıstrligi Mektepke deıingi jáne orta bilim, aqparattyq tehnologııalar departamentiniń derekterine súıensek, bıylǵy oqý jylynda 300 myńǵa jýyq bala birinshi synypqa barady. Qazirgi kezde mektepterge qabyldanǵan ótinishter kórsetkishi shamamen osyndaı, dep jazady Egemen.kz.
Departament mamandarynyń dereginshe, 2014-2015 oqý jylynyń basynda birinshi synypqa baratyn oqýshylardyń boljanyp otyrǵan kontıngenti naqty aıtqanda 277 575 balany quraıdy. Al ótken jyly mektepke alǵash barǵan balalardyń sany 270 myńnan asqan. Departament usynǵan statıstıkaǵa súıensek, respýblıkada 7649 mektep bar, onyń 7307-i – jalpy bilim beretin kúndizgi mektep. Mektepterdiń úshten ekisi – 3796 mektep qazaq tilinde, 1349-y orys tilinde oqytady. Mınıstrlik mamandarynyń málimetinshe, 2014 jyldyń 1 qyrkúıeginde elimizde 68 jańa mektep ashylady. Shyǵys Qazaqstan oblysynda –18, Ońtústik Qazaqstan oblysynda – 17, Astana qalasy men Qyzylorda oblysynda alty, Atyraý oblysynda toǵyz mektep paıdalanýǵa beriledi.
Mektep formasyna qatysty tıisti vedomstvo mamandary «Bilim týraly» zańǵa sáıkes, oqýshylar bilim mekemesi bekitken mektep formasyn saqtaýǵa mindetti ekenin aıtady. Mınıstrliktiń monıtorıngine qaraǵanda, 2012-2013 oqý jylynda mektep formasyn 4,5 myń mekteptegi 1,6 mln-nan astam oqýshy (61%) kıgen. О́tken oqý jylynda bul kórsetkish 72 paıyzdy, ıaǵnı 5,4 myń mekteptegi 1,8 mln oqýshyny quraǵan. Kıimniń sany men úlgisine qaraı mektep formasynyń ortasha quny - 4,5 myńnan 13,5 myń teńge aralyǵynda.
Al mektep formasyn engizý bilim mekemesiniń quzyrynda jáne ol mekemeniń jarǵysynda mindetti túrde kórsetilýi tıis. Mektep formasyn engizý týraly sheshimdi mektep keńesi men ata-analar jáne qamqorshylar keńesi jalpymekteptik ata-analar jınalysynda kópshilik daýys boıynsha qabyldaıdy. Kıim úlgisi ár mekteptiń qalaýyna qaraı tańdalady. Az qamtylǵan jáne kópbalaly otbasy balalary mektep formasymen jalpyǵa mindetti oqý qory qarajaty men demeýshilik qoldaý esebinen qamtylady. Mınıstrlik deregi boıynsha, birneshe jyl qatarynan júrgizilgen saýalnama nátıjesine oraı ata-analardyń 80 paıyzy mektep formasy bolǵanyn qoldaıdy.