Qazaqstan tamyz aıynda OPEK+ kelisimi aıasynda munaı óndirisin arttyratyn boldy. Keler aıda óndiris kólemi táýligine 1,491 mln barrelge deıin jetpek. Tıisinshe ár aı saıyn kvota táýligine 16 myń barrelge ulǵaıyp otyrady.
Energetıka mınıstrliginiń habarlaýynsha mundaı kelisim OPEK+ qatysýshy-elderdiń onlaın otyrysynda jasalǵan. Otyrys qorytyndysy boıynsha munaı óndirýdi aı saıyn táýligine 400 myń barrelge ujymdasa kóbeıtý týraly sheshim qabyldanypty.
«Nurlan Noǵaev óz sózinde OPEK+ kelisimi aıasynda qabyldanǵan sharalar arqasynda álemdik munaı naryǵyndaǵy ahýal jaqsy jaǵyna qaraı ózgergenin aıtty. Qazaqstan qatysýshy-elderdiń óndiristi arttyrýyn jaqtady» delingen taratylǵan habarlamada. Kelesi otyrys jeltoqsan aıynda bolady.
Áý basta Reseı men Saýd Arabııasy óndiristi 2022 jyldyń sáýirinen bastap, 2022 jyldyń sońyna deıin qysqartý týraly qazirgi kelisimdi qoldaǵan. Olardyń pozısııasy boıynsha óndiris tamyz ben jeltoqsan aralyǵynda aıyna 400 myń barrelden qosyp otyrýy tıis. Biraq buǵan BAÁ qarsylyq bildirgen. Olar óz kvotasyn táýligine 3,2 mln barrelden 3,8 mln barrelge kótergisi keldi. Uzaqqa sozylǵan kelissóz nátıjesinde BAÁ-niń bazalyq óndiris deńgeıi táýligine 3,65 mln barrelge artatyn boldy. Onyń esesine ámirlikter OPEK+ aıasynda shekteýlerdi 2022-niń jeltoqsanyna deıin sozýǵa kelisti. Sarapshylar BAÁ bastamasy ózge elderge de túrtki bolýy múmkin deıdi. Máselen, Irak OPEK+ kelisimi kúshine engennen bastap, halyqaralyq kompanııalardy qatystyra otyryp óndiris qýattylyǵyn arttyrǵan.
Osydan eki kún burynǵy derekterge qarasaq, munaı baǵasynyń az da bolsa óskenin baıqaımyz. 19 shilde kúni barreline 70 dollardan da tómen túsip ketken WTI munaıynyń baǵasy 0,04 paıyzǵa qymbattap, 71,94 dollar bolǵan. Al sońǵy on kúndiktiń basynda 71,82 dollarǵa baǵalanǵan Brent munaıy 0,26 paıyzǵa ósip, barreline 73,95 dollarǵa jetipti. Telegramdaǵy Tengenomika arnasynyń jazýynsha, OPEK+ uıymynyń kelisimi munaı baǵasyna teris áserin tıgizdi. «Brent kotırovkasy OPEK+ uıymynyń óndiristi aı saıyn táýligine 400 myń barrelge deıin arttyrý týraly sheshiminen keıin 70 dollardan da tómen quldyrap ketti. Qazir COVID-19-dyń úshinshi tolqynynyń bastalýyna baılanysty munaı jáne munaı ónimderine degen suranys aıtarlyqtaı tómendedi», dep jazady arna.