Mańǵystaý oblysynyń polısııasy úı tonaýshylardyń birneshe belgisin aıtyp berdi, dep jazady Egemen.kz.
Mańǵystaý polısııa bóliminiń qyzmetkerleriniń aıtýynsha, urylar páter ıesi uzaq ýaqyt úıde bolmaıtyn sátti kútedi. Ony bilý úshin birneshe tásildi qoldanady.
Mysaly, páterdiń poshta jáshigine gazet nemese jarnamalyq paraq salyp qoıady. Ol uzaq ýaqyt boıy alynbasa, urylar páter ıesi úıde joq dep topshylaýy múmkin.
Urylar páter ıesi qaı ýaqytta úıde bolmaıtynyn esik aldyndaǵy kilemsheniń astyna usaq ári ońaı úgitiletin zat jasyrý arqyly da biledi. Ol belgili ýaqyt aralyǵynda janshylmasa, sol kezde páterde eshkim bolmaıdy degendi bildiredi.
Sondaı-aq esikke nemese esiktiń tutqasyna jarnama paraǵy jabystyrylady. Ádette úı ıesi bul jarnamany alyp tastaıdy. Al olar birneshe kún boıy ornynda bolsa, páterdiń bos ekenin bildiredi.
«Joǵarydaǵy belgilerdi baıqasańyz, kúzetke eskertińiz. Uzaq ýaqytqa basqa jaqqa ketetin bolsańyz, kórshińizge nemese senimdi adamǵa poshtany, esikke jabystyrylǵan qaǵazdardy alyp otyrýdy ótinińiz.
Eger úıge kelgende syrtqy esiktiń ashyq turǵanyn nemese qulpy buzylǵanyn kórseńiz, birden kirmeńiz. Kórshilerińizdi, kúzetti nemese polısııa shaqyryńyz. Birden úıge kirý qaýipti, sebebi ury áli de úıde bolýy múmkin», dep jazylǵan habarlamada.