Prezıdent Qasym-Jomart Toqaev Natalıa Slekıshınaǵa raqymshylyq jasady. Aqparatty Prezıdent janyndaǵy raqymshylyq jasaý máseleleri jónindegi komıssııa múshesi, adam quqyqtary jónindegi ýákil Elvıra Ázimova rastady, dep habarlaıdy Egemen.kz.
«Kóp jaǵdaıda raqymshylyq jasaý kezdeısoq qylmys jasaǵan adamdarǵa qoldanylady. Natalıa Slekıshına jaǵdaıynda raqymshylyq jasaý aktisi quqyq qorǵaý organdarynyń qyzmetkerleri tarapynan oǵan jasalǵan zorlyq-zombylyq deregin memlekettiń moıyndaýymen de baılanysty. Túrmedegi zorly-zombylyq búkil álemde adamǵa táýeldi jaǵdaıyn qoldana otyryp, qatygezdik jasaý formalarynyń biri sanalady», dedi Elvıra Ázimova.
Qazaqstandaǵy adam quqyqtary jónindegi ýákil Natalıaǵa qatysty barlyq mán-jaı nazarǵa alynǵanyn, osyǵan baılanysty buryn sot qylmystyq jazany oryndaýdy keıinge qaldyrý týraly sheshim qabyldaǵanyn qosty.
«Sol kezden bastap bes jyl boıy ol ózin úlgili ana retinde kórsetip, óz betinshe jumysqa ornalasty jáne ekonomıkalyq turǵydan ózin-ózi qamtamasyz etti. Probasııalyq baqylaý kezeńinde onyń minez-qulqyna shaǵymdar túsken joq. Qazaqstan Prezıdenti qabyldaǵan raqymshylyq jasaý aktisi - bul meıirimdilik pen izgilik, memleket tarapynan senim aktisi», dep qosty Elvıra Ázimova.
Onyń aıtýynsha, IIM tarapynan osy jaǵdaıdan tıisti sabaq alý óte mańyzdy. Mundaı qylmystarǵa jol bermeý jáne olardy jasaǵany úshin kinálilerdi qatań jazalaý sharalary qabyldanady.«Qazirgi ýaqytta IIM túbegeıli reformalardy, sonyń ishinde penıtensıarlyq júıe iske asyp jatyr. Júrgizilip jatqan reformalar azamattardyń qadir-qasıetine qol suǵýdyń mundaı jaǵdaılaryn boldyrmaýǵa múmkindik beredi dep úmittenemiz», dep qorytyndylady ombýdsmen.
2015 jyldyń mamyrynda Natalıa Slekıshın segiz jylǵa bas bostandyǵynan aıyrylǵan. Ol «Iri mólsherde múlikti urlaý úshin jasalǵan qaraqshylyq» baby boıynsha kináli dep tanylǵan.