Orys kompozıtory S.Prokofevti shabyttandyrǵan Ý.Shekspırdiń «Romeo men Djýletta» atty shyǵarmasy álem jurtynyń rýhanı qazynasyna aınalǵan ǵajap dúnıe. Iá, bul Ý.Shekspırdiń muńdy mahabbat jyry. «Mahabbat» atty ǵajap sezimniń ıesi bolǵan eki jastyń ómiri. Bul shyǵarma HH ǵasyrda álem teatrlarynda kóp qoıylǵan balettiń biri.
Orys kompozıtory S.Prokofevti shabyttandyrǵan Ý.Shekspırdiń «Romeo men Djýletta» atty shyǵarmasy álem jurtynyń rýhanı qazynasyna aınalǵan ǵajap dúnıe. Iá, bul Ý.Shekspırdiń muńdy mahabbat jyry. «Mahabbat» atty ǵajap sezimniń ıesi bolǵan eki jastyń ómiri. Bul shyǵarma HH ǵasyrda álem teatrlarynda kóp qoıylǵan balettiń biri.
Balet alǵash ret Qazaqstan sahnasynda Iý.Grıgorovıchtiń qoıylymynda Abaı atyndaǵy akademııalyq opera jáne balet teatrynda iske asty. Endi osy balet elordadaǵy «Astana Opera» teatrynda qoıylyp, kórermendi dúr silkindirdi.
Bul baletti ár kezeńde Djon Krenko, Kennet Makmıllan jáne Rýdolf Nýrıev qoıǵan edi. Al osy jolǵy spektakldi belgili baletmeıster Sharl Jıýd qoıdy.
Djýlettany oryndaǵan Gaýhar Ýsına shyǵarmashylyǵy pisip, jetilgen qandaı bolsyn kúrdeli partııalardy óz deńgeıinde alyp shyǵa alatyn bıshi. Spektakldiń birinshi bóliminde balalyq jarqyn minezdi Gaýhar – Djýletta, ekinshi bólimde mahabbaty úshin qandaıda bolsyn sheshimge baratyn, janushyra sonyń jolyn izdegen tragedııaǵa toly beıneni kórsetti. Djýlettanyń Romeony kórip, ǵashyqtyq oty jalyndaǵan ishki sezimin aıaq ushyndaǵy usaq qımyl (pas suivi) arqyly, qos qoldyń qarapaıym qımyly arqyly oryndaǵanda júrek lúpili men jan tebirenisin kórermenge jetkizedi.
Al, Áıgerim Beketaeva somdaǵan Djýletta bala minezdi, oń-solyn tanyp bile qoımaǵan, kútýshisimen talasa oıyn oınap júrgen ańǵal jandy kórsete aldy.
Osy spektakldegi bıshilerdiń ishinde oryndaýshylyq sheberligimen kózge túsken Dosjan Tabyldy boldy. Ol ór minezdi, namysyn qoldan bermeıtin jigerli jan Tıbaldini somdady. Bıshi ishki jınaqylyǵymen, klassıkalyq bı qalyptaryn naqty, taza oryndaýy arqyly keıipkeriniń minez-qulqyn barynsha ashty.
Balet óneriniń tehnıkasyn joǵary deńgeıde meńgergen oryndaýshylardyń plastıkalyq erkindikteri kúrdeli obrazdardy ashýda úlken múmkindik bergeni kórinip turdy.
Spektaklde kordebalettiń alar orny erekshe. Verona qalasynyń alańyndaǵy urys-keris, aıqaı-shý tóbeles eki toptyń bir-birine tap bere oryndalatyn sekiris, júgirister arqyly beınelense, baldaǵy kópshilik bıler aqsúıek jandardyń asyqpaı jyljı aıaq tastaý arqyly kórsetilgen. Al, Djýlettany jerleý sherýi qara kıim kıip, shyraq ustaǵan qalypta jaı jyljý arqyly berilgen. Osy kópshilik sahnalar spektakldegi jeke obrazdardyń san qyrlarynyń ashylýynda negizgi psıhologııalyq júkti kóterýshi kúsh. Eki qarsy toptyń kópshilik sahnalary óziniń plastıkalyq yrǵaqty, psıhologııalyq boıaýlar arqyly sheshilgen.
Baletmeıster osy muńdy mahabbat ıeleriniń ómir súrgen ortasyn kórsetýde sátti kórsetilgen sýrettemelerin Djýlettanyń ólimimen baılanystyrǵan. Djýlettanyń denesin kóterip turǵan ákesi, eki jaǵynda basy men aıaǵyn qushqan anasy men kútýshisiniń qalpy, Romeonyń Djýlettanyń jansyz denesin arqasyna sala joǵary kóterip bılegen bıindegi keıpi shirkeýdiń aıqastyrylǵan (krest) belgisin bergendeı.
«Astana Opera» teatrynyń balet trýppasy óziniń jastyǵymen erekshelenetin ujym. Osy ujymnyń kásibı sheberliginiń shyńdalýynda dúnıejúzine belgili baletmeısterlermen jumys isteý belgili bir deńgeıde óz nátıjesin bergeni sózsiz.
Sóıtip, «Astana Opera» teatrynda S.Prokofevtiń «Romeo men Djýletta» baleti úlken tabyspen ótti.
Bı óneri kópqyrly. Sondyqtan da, osy jas teatr balet trýppasynan áli de talaı qyzyqty qoıylymdar kútemiz.
Toıǵan IZIM,
Qazaqstan Respýblıkasynyń eńbek sińirgen ártisi,
ónertaný kandıdaty.