Júrgizýshi kýáliginen aırylǵan elorda turǵyny ishimdik iship kólik júrgizip, saldarynan jol-kólik oqıǵasy oryn aldy, dep habarlaıdy Egemen.kz.
Áleýmettik jelide 777MVD nómirli kólik júrgizýshiniń jol erejesin buzǵany jarııalanǵan vıdeo taraldy. B eınejazǵa qatysty elordalyq Polısııa departamenti túsinikteme berdi.
«7 tamyz kúni saǵat 20:10-da Qarqaraly shossesindegi baǵdarshamda Lada Largus markaly avtokólik júrgizýshisi Lada Xray avtokóligimen soqtyǵysty. Kýágerlerdiń aıtýynsha, Lada Largus kóliginiń júrgizýshisi jol erejesin dóreki túrde buzyp, saldary jol-kólik oqıǵasyna alyp keldi. Onysymen qoımaı júrgizýshi ózin dóreki ustaǵan. Oqıǵa ornyna patrýldik polısııa ekıpajy jetti. Júrgizýshiniń qujatyn tekserý barysynda avtomobıl salonynan alkogoldiń ıisi baıqalǵan. Keıin medısınalyq saraptama nátıjesi kórsetkendeı, júrgizýshi mas bolǵan. Onyń ústine aıypty kólik júrgizý quqyǵynan aırylǵan bolyp shyqty», delingen habarlamada.
Departamenttiń habarlaýynsha, Qylmystyq kodeksiniń 346 baby 2 tarmaǵyna sáıkes, 27 jastaǵy júrgizýshige qarsy qylmystyq is qozǵaldy.
Elordalyq turǵyn kólik júrgizý quqyǵynyń joqtyǵyna qaramastan rólge otyrǵany jáne mas kúıinde kólik basqarǵany úshin aıypqa ilinip otyr. Búginde júrgizýshi qamalyp, onyń aıppul turaǵyna qoıyldy.
Polısııa departamentiniń málimetine súıensek, jyl basynan beri elordada mas júrgizýshiler kinásinen 163 jol-kólik oqıǵasy bolǵan. 10 adam túrli jaraqat alǵan.
Al ótken jyly mas kúıinde kólikke otyrǵan júrgizýshilerdiń kesirinen 10 adam jaraqat alyp, 1 adam mert bolǵan.