Aqmeshit gýmanıtarlyq-tehnıkalyq ınstıtýty jabylý aldynda tur, dep habarlaıdy Egemen.kz.
«Aqmeshit» gýmanıtarlyq-tehnıkalyq ınstıtýty Bas lısenzııasynan aıyryldy. QR Bilim jáne ǵylym mınıstrligi Bilim jáne ǵylym sapasyn qamtamasyz etý komıteti júrgizgen qaıta tekserý nátıjesi osyndaı», dep habarlaıdy QR Bilim jáne ǵylym mınıstrliginiń baspasóz qyzmeti.
Buǵan deıin ýnıversıtette tekserý júrgizip, nátıjesinde Komıtet qyzmetkerleri túrli zań buzýshylyqtardy anyqtaǵan. Oqý ornyna barlyq sáıkessizdikterdi joıýǵa ýaqyt berildi.
«Alaıda, ýnıversıtet ony bilim berý qyzmetiniń sapasyn jaqsartý úshin qajetti jumystardy júrgizýdiń ornyna, sot isin júrgizýge jáne QR Bilim jáne ǵylym mınıstrligi komıtetiniń áreketterine shaǵymdanýǵa jumsady», dep jazylǵan habarlamada.
«Biz tekseristerdi eldegi bilim men kadr sapasyn jaqsartý úshin júrgizetinimizdi túsiný mańyzdy. Sonymen birge biz joǵary oqý oryndaryn lısenzııadan birden aıyrmaımyz. Kemshilikterdi joıýǵa ýaqyt beremiz. Biraq olar muny istemedi. Osyǵan baılanysty biz keıinirek qatań shara qabyldaýǵa májbúr boldyq. Ýnıversıtetterdiń oqý jaǵdaıyn, bilim berý baǵdarlamalaryn jáne tutastaı alǵanda stýdentterge belgili bir mamandyqtardy úıretý tásilin jaqsartýyn qamtamasyz etý mańyzdy. Aqmeshit gýmanıtarlyq-tehnıkalyq ınstıtýtyna keletin bolsaq, sońǵy tekserý aǵymdaǵy jyldyń maýsymynda júrgizilgen. Buzýshylyqtar joıylǵan joq. Biz materıaldyq-tehnıkalyq bazanyń álsizdigi men oqý prosesin uıymdastyrýdaǵy eleýli kemshilikter týraly aıtyp otyrmyz. Keıbir pánderdi tıisti bilimi men ǵylymı dárejesi joq oqytýshylar júrgizgen. Oqý prosesi merziminen buryn aıaqtalyp, stýdentter bilim berý baǵdarlamalaryn tolyq meńgere almaǵan. Qazirgi kezde qalyptasqan tájirıbe boıynsha, ınstıtýt bizdiń lısenzııany qaıtaryp alý týraly sheshimimizge qarsy shyǵýǵa tyrysýda», deıdi QR Bilim jáne ǵylym mınıstrligi Bilim jáne ǵylym sapasyn qamtamasyz etý komıtetiniń tóraǵasy Gúlzat Kóbenova.
Oqý orny jabylǵan jaǵdaıda stýdentter basqa oqý oryndaryna aýysa alady.
«Biz abıtýrıentter men ata-analardy joǵary oqý ornyna tapsyrý kezinde baıypty bolýǵa shaqyramyz. Berilgen bilimniń sapasyn, jumysqa ornalasý perspektıvasyn, ýnıversıtettiń bedeli men reıtıngin eskerý qajet. Joǵary oqý oryndarynyń reıtıngin QR Bilim jáne ǵylym mınıstrliginiń tapsyrysy boıynsha «Atameken» QR AES júrgizedi», dep jazylǵan habarlamada.