Soltústik Qazaqstan oblysyndaǵy Birlik aýylynda qutyrma aýrýynyń tirkelýine baılanysty shekteý sharalary engizildi, dep habarlaıdy Egemen.kz.
SQO veterınarııa basqarmasynyń málimetinshe, Esil aýdany Birlik aýylynda túlkiniń óleksesi tabylǵan. Oqıǵa ornyna jetken mamandar saraptama alyp, janýardyń qutyrma aýrýynan ólgenin anyqtady.
«Qutyrma aýrýynyń tirkelýine baılanysty aýylǵa shekteý sharalary engizildi. Dezınfeksııa júrgizildi. It-qusqa, malǵa juqpaly aýrýǵa qarsy vaksına egildi. Qazir jaǵdaıdy baqylaýda ustap otyrmyz. Túlkiniń óleksesi sáýir aıynda tabylǵan edi. Aýyldyq okrýg ákiminiń shekteý sharalaryn engizý týraly sheshimi ádilet organdarynda uzaq ýaqyt boıy tirkeýde jatty. Sondyqtan, bul sharalar endi ǵana qolǵa alynyp jatyr», dep túsindirdi SQO veterınarııa basqarmasynyń bólim jetekshisi Qaıyrly Qazanov.
Bıyl SQO-da mal men úı janýarlarynyń qutyrma dertine shaldyǵýynyń 11 deregi tirkeldi. Juqpaly aýrýdyń aldyn alý maqsatynda 26 myń malǵa ekpe salyndy. Jyl sońyna deıin taǵy 30 myńnan astam úı janýaryna vaksına egilmek.