Almaty, Shymkent, Aqtóbe, Pavlodar jáne Taraz qalalarynda azamattarǵa jalǵan ekpe jasaǵan medısına qyzmetkerleri anyqtaldy, dep habarlaıdy Egemen.kz Qarjy monıtorıngi agenttiginiń baspasóz qyzmetine silteme jasap.
«Almaty, Shymkent, Aqtóbe, Pavlodar jáne Taraz qalalarynda jedel-izdestirý is-sharalaryn júrgizý kezinde koronavırýstyq ınfeksııaǵa qarsy vaksınasııalaýdyń jalǵan pasporttaryn zańsyz satýmen aınalysqan medısına qyzmetkerleri men basqa da adamdar anyqtaldy. Paıda tabý maqsatynda Densaýlyq saqtaý organdarynyń mindetteri men moral normalaryna qaıshy, azamattardy jalǵan vaksınasııalaý júrgizildi», dep habarlady AFM.
Dárigerler satyp júrgen jalǵan vaksınasııa pasporttarynyń quny 5 myń - 30 myń teńge aralyǵynda bolǵan.
«Atalǵan faktiler boıynsha qylmystyq kodekstiń 385-babynda kózdelgen qylmystyq quqyq buzýshylyq quramynyń belgileri boıynsha sotqa deıingi jeti tergeý bastaldy. Dárigerlerden jalǵan vaksına pasporttaryn satyp alǵan 37 azamat, sondaı-aq jalǵan qujat jasaǵan 12 adam, onyń ishinde segiz medısına qyzmetkeri anyqtaldy», dep atap ótti agenttikte.
Qalǵan kúdiktilerdi anyqtaý boıynsha jedel-tergeý sharalary jalǵasýda.
Eske sala ketsek, jalǵan vaksınasııa pasportyn paıdalanǵany úshin azamattarǵa qylmystyq kodekstiń 385 «jalǵan qujattardy, mórtabandardy, mórlerdi, blankilerdi, poshta tóleminiń memlekettik belgilerin, memlekettik nagradalardy qoldan jasaý, jasaý nemese satý» jazasy beriledi. Tártip buzýshylarǵa 160 AEK (shamamen 467 myń teńge) mólsherinde aıyppul salynady, ne sol mólsherde túzeý jumystary, ne 160 saǵatqa deıingi merzimge qoǵamdyq jumystarǵa tartý, ne 40 táýlikke deıingi merzimge qamaýǵa alý qaýpi bar.
Jasandy vaksınasııa pasporttary qatań jazalanady. Osy bap olar úshin 2 000 AEK (5,8 mıllıon teńge) deıingi mólsherde aıyppul salý, ne sol mólsherde túzeý jumystary, ne 600 saǵatqa deıingi merzimge qoǵamdyq jumystarǵa tartý, ne eki jylǵa deıingi merzimge bas bostandyǵyn shekteý, ne sol merzimge bas bostandyǵynan aıyrý túrindegi jazany kózdeıdi.
Eger buzýshylyq jyl ishinde qaıtalap anyqtalsa, sondaı-aq vaksınasııa pasporttaryn qoldan jasaý aldyn ala sóz baılasý arqyly júzege asyrsa, aıyppul 4 000 AEK-ke deıin ósedi, al bul 11,6 mıllıon teńge. Sondaı-aq tártip buzýshylardy 1000 saǵatqa deıingi merzimge qoǵamdyq jumystarǵa tartýǵa, ne tórt jylǵa deıingi merzimge bas bostandyǵyn shekteýge, ne sol merzimge bas bostandyǵynan aıyrýǵa bolady.