QR Prezıdenti Qasym-Jomart Toqaev Qaraǵandy oblysyndaǵy dala órtin sóndirýge qatysqan órt sóndirýshiler men áskerı qyzmetshilerdi «Erligi úshin» medalimen marapattady, dep jazady Egemen.kz QR Tótenshe jaǵdaılar mınıstrliginiń baspasóz qyzmetine silteme jasap.
Búgin QR Tótenshe jaǵdaılar mınıstrliginde Qaraǵandy oblystyq Tótenshe jaǵdaılar departamentiniń órt sóndirýshileri men 52859 áskerı bóliminiń áskerı qyzmetshilerin saltanatty marapattaý sharasy ótti.
Olar bıylǵy shilde aıynyń basynda Qaraǵandy oblysynda tutanǵan dala órtiniń jaqyn mańdaǵy eldi mekenderge taralýynyń aldyn aldy.
Tótenshe jaǵdaılar mınıstri Iýrıı Ilın Prezıdent Qasym-Jomart Toqaevtyń atynan Baýyrjan Bilálovke, Ulan Keńeske, Vladımır Malıýtınge, Aıatolla Nábıevke «Erligi úshin» medaldaryn, sondaı-aq Qazybek Ámirbekovke, Bolat Orazbekovke, Mádı Rústemge, Erjan Sultanbekovke Qurmet gramotalaryn tabystady.
«Bizdiń qutqarýshylar dala órtterin sóndirýge atsalysqan qatysýshylarmen birge Baıqońyr, Alǵabas, Túıemoınaq, Pıoner, Aqtas, Qulymbek, Malshybaı eldi mekenderin qorǵap, ottyń qarqyndy taralýynyń aldyn aldy. Barlyǵy 40 500 gektardan astam dala órtin joıdy. Mınıstr marapattalýshylarǵa aýyl sharýashylyǵy alqaptaryn saqtap, eldi mekenderdi aýqymdy apattan qutqarýdaǵy kórsetken batyrlyǵy men joǵary kásibı biliktiligi úshin alǵys aıtty. Marapattaý rásiminen keıin Qaraǵandy oblysynyń órt sóndirýshileri men áskerı qyzmetshileri úshin QR Ulttyq mýzeıinde jáne №4 mamandandyrylǵan órt sóndirý bóliminde ekskýrsııa ótkizildi», dedi QR TJM baspasóz qyzmetiniń resmı ókili Talǵat Ýálı.