Nur-Sultan qalasynda baspana máselesin sheshý úshin 2019 jyldan beri jumys isteıtin jastarǵa satyp alý quqyǵynsyz jalǵa páterler berý jobasy qolǵa alyndy. Búginge deıin atalǵan baǵdarlama arqyly 1400 jas baspanaly boldy, dep habarlaıdy Egemen.kz.
Jastar jylynyń saltanatty ashylý sharasynda QR Tuńǵysh Prezıdenti – Elbasy Nursultan Nazarbaev jumys isteıtin jastarǵa satyp alý quqyǵynsyz jalǵa páterler berý týraly tapsyrma bergen. Elbasynyń tapsyrmasyn 2019 jyly Nur-Sultan qalasynyń ákimdigi tolyqtaı oryndap, jumysshy jastarǵa 1050 páterdiń («Astanalyq» jáne «Álem» saýda ortalyqtarynyń arasyndaǵy turǵyn úı kesheni) kiltin tabystady.
Kelesi 2020 jylǵa da dál osyndaı meje qoıylǵan edi, alaıda pandemııaǵa baılanysty josparǵa ózgeris endi. Koronavırýs epıdemııasyna baılanysty byltyr 350 páter tapsyryldy. Jumysshy jastarǵa páterler Nur-Sultan qalasyndaǵy R.Qoshqarbaev dańǵyly, Qordaı jáne № 23-31 kósheleri qıylysyndaǵy, sol sııaqty Abylaı han dańǵyly men B.Momyshuly jáne R.Qoshqarbaev dańǵyldarynyń qıylysyndaǵy turǵyn úılerden berildi. Bul jyly jastarǵa berilgen baspana kólemi 32-48 sharshy metr aralyǵyn quraıdy.
Elbasynyń bastaýymen júzege asqan jobanyń maqsaty – aldaǵy 5 jyl ishinde jastardyń qarajat jınap, jeke úıin satyp alýyna jaǵdaı jasaý.
Joba qatysýshylaryna qoıylar negizgi bes qaǵıdat bar: 29 jastan aspaǵan, jumys isteıtin, menshiginde turǵyn úıi joq, jınaq jasaý úshin depozıttik shotynyń bolýy, sondaı-aq sońǵy 6 aıda keminde 40 AEK tabysynyń bolýy. Jobaǵa qatysýshylar qatary da az emes. Byltyr 1-6 jeltoqsan aralyǵynda ótinimder qabyldaý uıymdastyrylyp, jalpy 5463 ótinish qabyldandy.
О́tinim bergen qatysýshylar arasynda irikteý baldyq júıe boıynsha, al páterlerdi bólý ótinish berýshiniń otbasy quramyna sáıkes júrgizildi.
Bıyl jyl sońyna deıin jumys isteıtin jastarǵa satyp alý quqyǵynsyz jalǵa beriletin 1050 baspananyń kilti tabys etilmek.
Aıta keteıik, elordada baspana máselesin sheshý úshin aýqymdy sharalar júrgizilip jatyr. О́tken jyly elordada jalpy kólemi 3 mıllıon sharshy metr bolatyn turǵyn úı salynyp, el ıgiligine berdi. Sol sııaqty áleýmettik páter berý kórsetkishi de eselep ulǵaıdy. Máselen 2019 jyly 2900 áleýmettik páter paıdalanýǵa berilse, bıyl bul kórsetkish 10 myńǵa deıin artty.