Bereketimizdi qashyrǵan báleket indet barǵan saıyn úreıimizdi ushyryp, údep barady. Alqymnan alatyn adýyny qatty aýrý aınalamyzdaǵy talaı jaqsy men jaısańnan aıyryp jatyr. Keshe ǵana esen-saý, elge es bolyp júrgen tulǵalarymyzdyń kenetten kesapat keseldiń kesirinen qaıtys bolǵanyn estigen jurt ájeptáýir eseńgirep qaldy. Jalpy, elimizde kún saıyn júzden asa adamnan kóz jazyp qalyp jatyrmyz.
Kúni keshe koronavırýstan 118 azamatymyz qaıtys bolyp, qanshama otbasy aza tutty. Onyń aldynda ǵana 123 adam baqılyq bolǵan. Al 13 tamyzda 152 adamnyń jany úzilip, buǵan deıin bolmaǵan, bir kúnde indetten kóz jumǵan eń soraqy kórsetkish tirkeldi. Osylaısha, bul qater onsyz da az-aq qazaqtyń qataryn kemitip, «janymyzdyń japyraqtaryn bildirtpeı julyp jatyr». Sony baıqap-bilsek, sezinsek, opynyp-ókinip barmaq tistesek, osylaı áli de beıqam, selqos júrer me edik?! Áı qaıdam, bul nemquraılyǵymyzben qaýipti dertke qarsy qylar qaıran bolmas.
О́kinishke qaraı, osy aýrýdan tapqan azabymyz, qazamyz azaımaı tursa da, indettiń taralýyn kúsheıtetin toı-tomalaqtar tyıylar emes. Toıdy doǵarýǵa, tártip saqtaýǵa, vaksına saldyrýǵa degen salǵyrttyq naýqastardyń da, marqumdardyń da sanyn arttyryp jatyr.
Jalpy, búgingi tańda elimizde 120 488 adam koronavırýs ınfeksııasynan emdelýde, olardyń ishinde 30 996 pasıent stasıonarda, 89 492 naýqas ambýlatorlyq deńgeıde em qabyldaýda. Sondaı-aq indetke shaldyqqandardyń arasynda 910 adamnyń jaǵdaıy aýyr, 529 pasıenttiń jaǵdaıy óte aýyr, 251 naýqas О́JJ apparatynda jatyr.