Jambyl oblysynda jalǵan qujat jasaǵan veterınarlar jaýapqa tartyldy, dep habarlaıdy Egemen.kz.
Olar sońǵy eki jyl boıy ekpe jumystaryn tek qaǵaz júzinde júrgizip kelgen.
Al anyǵynda tórt túliktiń basym kópshiligi vaksına almapty. Veterınarlar óńirdegi mal sanyn arnaıy bazadan alyp, sol arqyly qanshama doza vaksınany joıyp otyrǵan. Keıin belgili bolǵandaı, keıbir sharýashylyq ıeleri ol maldy áldeqashan satyp jibergen eken, al bazadan alýǵa úlgermegen. Máselen, Moıynqum aýdanynyń veterınar dárigeri 350 bas malǵa ekpe salamyn dep 2 myń doza vaksınany esepten shyǵarǵan. Endi zań aldynda jaýap beredi. Sonymen qatar sybaılas jemqorlyqqa qarsy qyzmet ókilderi keıbir mal dárigerleriniń dıplomsyz jumys istep kelgenin de anyqtady. «Jetitóbe selolyq okrýgindegi veterınarlyq pýnktke joǵary bilimi joq adamdy basshy etip taǵaıyndaǵan. Sondaı-aq bul salada eshqandaı tájirıbesi joq mamandy jetekshi jumystarǵa bekitkeni belgili boldy. Qazir bul azamattar atqaryp otyrǵan qyzmetterinen bosatylyp, veterınarlyq stansııa basshysy ákimshilik jaýapqa tartyldy», dep málimdedi oblystyq sybaılas jemqorlyqqa qarsy is qımyl departamenttiń bas mamany Qaırat Aqmurzaev.