Bas sanıtarlyq dárigerdiń qaýlysyna qaramastan, qoǵamdyq tamaqtaný oryndary men oıyn-saýyq mekemeleriniń ákimshilikteri men ıeleri tarapynan sanıtarlyq talaptardy buzý faktileri jıi anyqtalyp otyr, dep habarlaıdy Egemen.kz Nur-Sultan qalasy Polısııa departamentiniń baspasóz qyzmetine silteme jasap.
Osylaısha, mobıldik toptar reıd barysynda túngi saǵat 22.32-de Imanov kóshesinde kelýshilerdi qabyldap otyrǵan «Shashlykoff» laýndj baryn anyqtady. Onyń ishinde 40-qa jýyq klıent bolǵan. Buǵan deıin bul mekeme karantın rejımin buzǵany úshin birneshe ret jaýapqa tartylǵan.
Sondaı-aq «Esil» aýdany boıynsha keshki ýaqytta toı ótkizilip jatqany anyqtalǵan. «Han Talapaı» meıramhanasynyń ákimshiligi sanıtarlyq talaptardy oryndamaı, otbasylyq merekege 120 qonaq kirgizgen.
Budan basqa, saǵat 23.50-de «102» nómirine telefon soqqan elorda turǵyny Turan dańǵylyndaǵy «Slavık» dámhanasynyń jumys istep, turǵyndarǵa tynyshtyq bermeı otyrǵanyn habarlady. Atalǵan fakt «YEDILOV ONLINE» telegram-arnasynda jarııalanǵan. Oqıǵa ornyna mobıldik top jiberildi. Tekserý kezinde kóńil kóterý ornynyń jasyryn jumys istep otyrǵany, kireberis esigi jabyq ekeni anyqtaldy. Elorda turǵyny túsirgen vıdeo negizge alynyp, kináli azamattardy jaýapqa tartý úshin jınalǵan materıalǵa qosa tirkeledi. О́tken táýlik ishinde mobıldik toptar kásipkerliktiń 70 nysanyn tekserip, karantın rejımin buzýdyń 10 faktisin anyqtady.
Nur-Sultan qalasynyń Polısııa departamenti karantın talaptaryn buzý úshin artylatyn jaýapkershilik týraly eskertip, qala turǵyndaryn sanıtarlyq normalardy oryndaýyn suraıdy.