Oblystyń sanıtarlyq-epıdemıologııalyq baqylaý departamentiniń bastyǵy Áset Jumataevtyń baıandamasynda monıtorıng jasaıtyn toptardyń jumysy mardymsyz ekeni aıtyldy. Sońǵy eki aptada olar barlyǵy 142 reıd jasap, 30 buzýshylyqty ǵana anyqtaǵany jetkizilgen edi. Sondaı-aq Aıyrtaý, Aqjar, Aqqaıyń, Esil, Jambyl, M.Jumabaev, Qyzyljar, Mamlıýt, Ýálıhanov jáne Shal aqyn aýdandarynda birde-bir buzýshylyqtyń anyqtalmaǵany atap ótilgen.
Jarqyraǵan jazda 10 aýdanda eki aptada birde-bir toıdyń ótpeýi múmkin emes ekeni belgili. Tek monıtorıngtik toptar olardy kórmegen nemese «kórmegen bolǵan». Árıne, qalyptasyp qalǵan dástúrdi qorqytýmen, aıyppul salýmen bir mezgilde toqtatý qıyn. Adamdar toıǵa asyǵady, ony jasaǵansha, qyzyq kórgenshe jan tappaıdy. Biraq qazirgi ahýal qysyp, indet kúnnen-kúnge ulǵaıyp jatqanda sabyr saqtap, óziniń de, ózgeniń de densaýlyǵy úshin toıdy keıinge qaldyrýǵa bolady ǵoı. Osyny túsinbegen adamdardy aıaýǵa da bolmaıdy.
Osyndaı adamdarǵa aıyppul salý úshin ǵana emes, densaýlyqtaryn saqtaý úshin qurylǵan Qyzyljar óńirindegi monıtorıngtik toptardyń sany – 24. Olardyń qataryna ákimdiktiń, polısııanyń, volonterlerdiń qatarynan 160 adam engen. Tekserýler ár aptanyń aıaǵyna qaraı jıilenedi.
О́zderiniń atyna aıtylǵan synnan soń monıtorıngtik toptar jumystaryn belsendirek júrgizýge aınaldy. Sońǵy 7 kúnde olar 28 buzýshylyqty anyqtady. Ásirese, Petropavl qalasynyń saýyqjaılary, dámhanalary, jalǵa beriletin kottedjderi jiti tekserildi. Sonymen birge sanıtarlyq normatıvterdiń saqtalýyn baqylaý barlyq saýda oryndarynda da uıymdastyrylǵan.
О́tken aptadaǵy bir «olja» qalanyń «Bereke» shaǵyn aýdanynda boldy. Osyndaǵy jekemenshik úılerdiń arasyndaǵy bir dámhanada týǵan kún toılanyp jatqanynyń ústinen túsken monıtorıngtik top jıyndy uıymdastyrýshylar men qonaqtardyń ústinen hattama toltyrdy. Ol shara qoldanylýy úshin tıisti organǵa jiberildi. Munda úı ıesi men qonaqtardyń bári de monıtorıngtik toptyń jumysyna kedergi jasamaı, olardyń talabyn oryndaǵan. Demek bári de saqtandyrý sharalarynyń bolǵanyn qalaıdy, biraq bile tura ózderi ony buzǵan.
Jalpy, oblys boıynsha jyl basynan beri 1 059 karantın talaptaryn buzǵan jaǵdaı anyqtalǵan. Onyń ishinde 941-i Taýarlar men qyzmetterdiń sapasy men qaýipsizdigin baqylaý departamentine jiberilgen. Al qalǵan 118 materıal boıynsha tolyqtyrý jumystary júrgizilýde. Sanıtarlyq-epıdemıologııalyq baqylaý departamentiniń óz qyzmetkerleri 627 ákimshilik hattama toltyrǵan. Zamana talabymen amalsyz uıymdastyrylǵan monıtorıngtik toptyń jumysy odan ári jalǵasýda.
Soltústik Qazaqstan oblysy