Polshanyń Vroslav qalasynda Eýropa shaǵyn fýtbol federasııasynyń (EMF) kezekti otyrysy ótti. Oǵan «Qazaqstan áýesqoı fýtbol lıgasy» qoǵamdyq birlestiginiń tóraǵasy Erlan Jarylqasynov bastaǵan qazaqstandyq delegasııa qatysty. Bul týraly egemen.kz tilshisi habarlady.
Otyrysqa Eýropadan jalpy sany 32 eldiń ókilderi qatysyp, áýesqoı fýtbolshylardyń jarystaryn damytýǵa arnalǵan máselelerdi talqylady. Sonymen birge jıynǵa qatysqan fýtbol mamandarynyń ishinde Dúnıejúzilik shaǵyn fýtbol federasııasynyń prezıdenti Fılıp Djýdı bastaǵan delagasııa da óz oılaryn aıtyp, pikirlerimen bólisip otyrdy. Jalpy, jıynǵa qatysýshylar elishilik týrnırler men jarystardy, qurlyqtyq chempıonatty damytýǵa basa nazar aýdardy. Sonyń ishinde bizdiń eldiń ókilderi 2015 jyly áýesqoı fýtboldan Eýropa chempıonatyn Astanada ótkizý týraly usynysyn jasady. Budan basqa kelesi jyly ótetin qurlyqtyq básekeni Germanııa, Italııa men Izraıl elderi de ótkizýge úmitti ekenderin jasyrmady.
Jaqynda biz osy jıynǵa qatysyp, Qazaqstan atynan kelesi jyly Eýropa chempıonatyn ótkizýge ótinish bergen «Qazaqstan áýesqoı fýtbol lıgasy» qoǵamdyq birlestiginiń tóraǵasy Erlan Jarylqasynovpen habarlasyp, otyrysta qaralǵan máseleler týraly surastyrǵanymyzda ol bizge bylaı dedi: « Bizdiń el 2015 jyly Astanada áýesqoı fýtbolshylar arasynda Eýropa chempıonatyn ótkizýge ótinishin berdi. Bul básekeni biz aldymen elimizde fýtboldy damytýǵa, halyq arasynda salamatty ómir saltyn nasıhattaýǵa, jastarymyzdyń fýtbol oınap, kóbirek sportpen aınalysýy úshin jasap otyrmyz». Sonymen birge ol qurlyqtyq dodany jyldan-jylǵa sáýleti men dáýleti damyp kele jatqan Astanany Eýropa elderine, búkil álemge kórsetý úshin de ótkizgisi keletinderin aıtty. «Mundaı jarys elimizde buryn-sońdy bolmaǵan. 2015 jyly Eýropa chempıonatynyń qaı elde ótetini 31 naýryz kúni belgili bolady. Bizdiń oıymyzsha, Astanada qurlyqtyq dodany ótkizýge múmkindik bar. О́ıtkeni, Qazaqstan Eýropa shaǵyn fýtbol federasııasynyń quramyna kirgen 2012 jyldan beri áýesqoı fýtboldy damytýǵa bar kúsh-jigerin salyp keledi. Muny qazir bári moıyndap otyr. Sol kezden bastap «Qazaqstan áýesqoı fýtbol lıgasy» qoǵamdyq birlestiginiń jyl saıyn uıymdastyratyn týrnıriniń jeńimpazy Eýropa chempıonatyna qatysýda. Máselen, astanalyq «Saıran» komandasy 2012-2013 jyldary «Qazaqstan áýesqoı fýtbol lıgasy» ótkizetin týrnırdiń jeńimpazy retinde eki jyl qatarynan qurlyqtyq chempıonatqa qatysyp, oıyn órnegimen jankúıerlerdiń ystyq yqylasyna bólendi. Endi bıyl «Semeı» komandasy Qazaqstan atynan Eýropa chempıonatyna qatysady. Bul komanda byltyr áýesqoı fýtbolshylar arasynda ótken týrnırdiń jeńimpazy atanǵan», dedi ol.
Erlan Jarylqasynovtyń aıtýynsha, qazir Qazaqstan Eýropa shaǵyn fýtbol federasııasynyń reıtınginde 32 eldiń arasynda 9-orynda tur. Osynyń ózi de 2015 jyly elimizde qurlyqtyq chempıonatty ótkizýge múmkindik beredi, deıdi ol.
Dastan Kenjalın.
Derekkóz: «Qazaqstan áýesqoı fýtbol lıgasy» qoǵamdyq birlestiginiń tóraǵasy Erlan Jarylqasynov.