Qostanaı oblysynda esirtki saýdasyna qatysy bar 10 eks-polıseıge sot úkim kesti. Bul týraly «Habar» telearnasy habarlady.
Quqyq qorǵaý qyzmetkerlerine kúdiktilermen sybaılasty, bas paıdasy úshin aýyr qylmysty jasyrdy degen aıyp taǵyldy. Jalpy, osy is boıynsha 16 adam jaýapqa tartylǵan. Sonyń ishinde esirtki saýdasymen aınalysqan 6 áıel eken.
Kúdiktiler polısııa qyzmetkerleriniń «kómek kórsetýimen» birneshe jyl boıy zańsyz áreketterin iske asyryp kelgen. Eki tomdyq úkimniń mátini 500 betten turady.
Sonymen, esirtki saýdasyn uıymdastyrýshy 2 áıel 20 jylǵa bas bostandyǵynan aıryldy. Qalǵan 4 aıypker 8-10 jylǵa sottaldy. Al qylmyskerlermen sybaılas bolǵan burynǵy quqyq qorǵaý qyzmetkerleriniń biri 16 jyl, qalǵandary 2-den 6 jylǵa deıin ómirlerin temir torda ótkizetin boldy. Bári de sheninen aıryldy ári múlki tárkilendi.
«Sot barlyq dáıekterdi jan-jaqty zerttep, istiń aqıqatyn ashýǵa tyrysty. Kózimiz jetkeni, bul esirtki saýdasyna qatysty árkimniń atqaratyn mindeti, jumysy naqty belgilengen. Al polısııa qyzmetkerleri qylmyskerlerdiń sybaılastaryna aınalǵan», - dedi Qostanaı oblysy aýdanaralyq qylmystyq ister jónindegi sotynyń tóraǵasy Asylbek Jumaǵulov.
Ámirhan Almaǵanbetov.
Derekkóz: «Habar» telearnasy.
Foto: «Habar» telearnasy.