Shymkent qalasynda erekshe qajettilikteri bar jandardyń kitapqa qoljetimdiligin arttyrýǵa arnalǵan aýqymdy joba qolǵa alyndy, dep habarlaıdy Egemen.kz.
Búgingi kúnge deıin «Sóıleıtin kitaptar shyǵarý» bóliminde kitaptardyń jalǵyz qyzmetker tarapynan dybystalynýyna baılanysty aýdıokitap qorynyń tolyǵýy baıaý júrgiziletin. Endi, kitaphananyń aýdıokitaptar qory teatr ártisteri jáne basqa mádenıet salasy qyzmetkerleri dybystaǵan kitaptarmen tolyǵýda.
Bul jobaǵa qatysýshylar qatarynda Shymkent qalalyq opera jáne balet teatrynyń dırektory, Qazaqstannyń eńbek sińirgen ártisi, memlekettik syılyqtyń laýreaty Maıra Muhamedqyzy, Shymkent qalalyq orys drama teatrynyń dırektory, QR eńbek sińirgen qaıratkeri Igor Verbıskıı, Shymkent qalalyq J.Shanın atyndaǵy akademııalyq qazaq drama teatrynyń kórkemdik jetekshisi, QR eńbek sińirgen qaıratkeri, professor, rejısser Bekbolat Qurmanǵojaev, Shymkent qalalyq J.Shanın atyndaǵy akademııalyq qazaq drama teatrynyń akteri, QR mádenıet qaıratkeri Erkin Shymyrqulov, Shymkent qalasynyń mádenıet, tilderdi damytý jáne arhıvter basqarmasynyń basshysy Hanzada Esenova jáne t.b. qyzmetkerler bar.
Qazirgi tańda, arnaıy kitaphananyń kitap qory 140376 danany quraıdy. Negizgi kitap qory bederli-núkteli áripti, jazyq baspaly, dıskide, nashar kóretinderge arnalǵan mátini úlkeıtilgen áripter jazylǵan ádebıetter men merzimdi basylymdar, kishi qalyptaǵy músinder, bederli-grafııalyq quraldardy quraıdy. 2003 jyldan beri dybystalyp kele jatqan aýdıokitaptar sany 5000-nan asady.