Nur-Sultanda vaksınasııalanǵan jastar arasynda 1,5 mln teńge oınatylady. Elordalyq «Astana jastary» resýrstyq ortalyǵy halyqaralyq Jastar kúni qarsańynda «Stop COVID-19» úzdik beıne-challenge baıqaýyn uıymdastyrady, dep habarlaıdy Egemen.kz Nur-Sultan qalasy ákimdiginiń resmı saıtyna silteme jasap.
Baıqaý vaksınasııa arqyly stýdentter arasynda COVID-19 taralýyna qarsy kúres, sondaı-aq jastar arasynda shyǵarmashylyq klasterdi qoldaý maqsatynda ótkiziledi. Baıqaý jeńimpazy «Idiris Orynbasar atyndaǵy qaıyrymdylyq qorynan» 1 mıllıon teńge alady. Ekinshi orynǵa – 300 myń teńge, úshinshi orynǵa – 200 myń teńge. Sondaı-aq, baıqaýǵa qatysýshylar úshin «Arena fitness», «Winox» fıtnes-zaldarynyń jelilerinen jáne «Hlebnyı kraı» kompanııasynan yntalandyrý syılyqtary qarastyrylǵan.
Baıqaý osy jyldyń 5 tamyzy men 5 qazan aralyǵynda ótedi. Oǵan elordanyń orta arnaýly (kolledjder) jáne joǵary oqý oryndarynyń kámeletke tolǵan stýdentteri qatysa alady.
«Sharttar óte qarapaıym: nıet bildirgen qatysýshylar 5 tamyzdan 5 qyrkúıekke deıin Google Forms arqyly Instagram jelisinde @astana_jastary profıliniń taqyrypshasyna qatysýǵa ótinim jiberýi qajet. Sodan keıin qatysýshy Nur-Sultan qalasyndaǵy kez kelgen vaksınasııa pýnktinde 5 tamyz ben 5 qazan aralyǵynda ekpe alýy tıis. Ary qaraı, vaksınasııa ornynan shyǵarmashylyq beıne-challenge túsirip, ony Instagram jáne Tiktok-ta taratýy kerek. Jarııalanymdardyń astynda heshtegterdi kórsetýdi umytpańyz: #stopCovid #molodejzavaksınasııý #nsjastary #astanajastary jáne chellendjge tartylǵan qatysýshylardyń sanyn baqylaý úshin jekelegen bir heshteg oılap tabý qajet. Baıqaý sońynda izinen ergen adamy kóp beınerolık avtory (birinshi, ekinshi, úshin oryn) aqshalaı syılyq alady.