Túrkistan oblysynyń polısııa departamenti 8-12 jas aralyǵyndaǵy oqýshylar arasynda «Men elimdi súıemin!» taqyrybynda sýret salýdan baıqaý uıymdastyrdy. Oǵan departamentke qarasty 17 aýdandaǵy polısııa bólimi, basqarma qyzmetkerleriniń sýret salýǵa beıim ul-qyzdary qatysqan. Usynylǵan 84 sýrettiń úzdikterin anyqtaý úshin arnaıy qazylar alqasy qurylǵan.
Polısııa departamentiniń bastyǵy, polısııa general-maıory Qaırat Dálbekov baıqaý jeńimpazdaryn marapattaý rásiminde qatysýshylarǵa alǵysyn jetkizdi. «Senderge úlken rahmet, boılaryńdaǵy daryndaryńdy ortaǵa salyp, jarysqa qatystyńdar. Bizdiń qazylar senderdiń eńbekterińdi jiti qarap, ishindegi eń ádemi salynǵandaryn iriktep aldy. О́nerleriń órge júzsin!», dedi general-maıor. Qazylar alqasy jas daryndar qolynan shyqqan týyndylarǵa óz baǵasyn berdi. Iаǵnı baıqaý qorytyndysynda myńnan tulpar, júzden júırik shyqqan 15 qatysýshy anyqtalyp, arnaıy «Alǵys hat», sondaı-aq syılyq retinde mektepke arnalǵan sómkeler jáne keńse zattary tabys etildi. Júldeli III oryndy Tólebı APB kóshi-qon qyzmeti tobynyń aǵa ınspektory, polısııa maıory Nurbol Seıitbekovtiń 12 jastaǵy qyzy Amıra Abdısapar ıelense, II oryndy TO PD JQAJ ınspektor-psıhologi, polısııa kapıtany Áıgerim Isaevanyń 11 jastaǵy qyzy Kamıla Elmurat aldy. Al I oryndy Túrkistan QPB JPQ ýchaskelik polısııa ınspektory, polısııa maıory Mýhammad Jumadılaevtyń 10 jastaǵy qyzy Mıra Hanadılla jeńip aldy. Júldeli oryn ıelerine zamanaýı smartfon, uıaly telefon syıǵa berildi.
Oqýshylardyń boıynda týǵan jerge degen patrıottyq sezimin arttyryp, bos ýaqyttaryn tıimdi paıdalanýǵa daǵdylandyrý maqsatyndaǵy sharalardy polıseıler aldaǵy ýaqytta da uıymdastyryp turmaq.
Túrkistan oblysy