Túrkistan qalasyna arnaıy issaparmen kelgen reseılik ǵalym, tarıh ǵylymdarynyń kandıdaty, nýmızmat Pavel Petrov «Áziret Sultan» qoryq-mýzeıiniń qoryna jeke azamattardan jınaqtaǵan nýmızmatıkalyq kolleksııasyn ótkizdi.
«Mýzeıge syı» aksııasyna úles qosý úshin arnaıy ákelingen jádigerler arasynda VIII-XIX ǵasyrlar aralyǵyn qamtıtyn mys jáne kúmis tıyndar bar. Mamandardyń aıtýynsha, atalǵan ejelgi aqsha túrleri Túrkistan óńiriniń tarıhymen baılanysty.
«Áziret Sultan» qoryq-mýzeıiniń qory nýmızmatıkalyq kolleksııalarǵa baı. Túrkistanǵa kelgen saparymda tanysyp, kórdim jáne resmı saıttan da qarap shyqtym. Bul jádigerler meniń qorymda emes, arnaıy tarıhı orynda turý kerek dep sheshtim. Tarıhshy tarıhı muralardy jınaqtaýǵa umtylady. Nýmızmatıka salasyn zertteý eńbek jolymnyń negizgi bóligi bolǵandyqtan bul zattardy jyldar boıy jınaqtadym», deıdi reseılik ǵalym.
Qoryq-mýzeıdiń qor saqtaýshy qyzmetkeri, nýmızmatıka salasynyń mamany Tolqyn Joldasov mýzeı qoryna tabystalǵan jádigerlerdiń ózindik qundylyqtary bar ekenin aıtty. «Jádigerler qatarynda VIII ǵasyrdyń túrgesh tıyndary men X ǵasyrda soǵylǵan samanıd felsteri jáne XI ǵasyrǵa tán dırhemder bar. Sondaı-aq keıingi tarıhı kezeńderde soǵylǵan aqshalar da kezdesedi», dedi ol.
Aıta keteıik, «Áziret Sultan» qoryq-mýzeıindegi «Mýzeıge syı» aksııasynyń tarıhy áıgili qolbasshy Ámir Temir zamanynan bastaý alady. Máselen, kesenede saqtalǵan altyn, kúmis jalatylǵan 6 shyraǵdan men taıqazan, laýha syndy jádigerlerimiz bolsa, olardyń keıingi tarıhy memleket jáne qoǵam qaıratkeri, etnograf О́zbekáli Jánibekovtiń esimimen tyǵyz baılanysty. Qoja Ahmet Iаsaýı kesenesi respýblıkalyq mýzeı retinde halyqqa qyzmet kórsete bastaǵan kezde mýzeı qorynda 300-den asa jádiger bolsa, qazirgi sany 26 000-ǵa jýyqtaǵan.